Бэҕэһээ өрөспүүбүлүкэ Ил Дархана Айсен Николаев Өлүөнэ муостатын тутуу, үөрэх уонна тыа хаһаайыстыбатын туһунан “Саха” НКИХ ханаалыгар “Ил Дарханныын кэпсэтии” биэриигэ кэпсээбитэ. Бүгүн ол кэпсэтииттэн быһа тардан суруйабыт.
— Айсен Сергеевич, тыа сиригэр аналлаах саҥа дьаһаллары дьон-сэргэ олус үөрэ иһиттэ. Холобур, төрүүр ынах төбөтүгэр субсидия ананыаҕа диэбитиҥ. Ити олоххо киириитэ хаһан саҕаланыай?
— Бу быһаарыы 2021 сылга киириэҕэ. Бу сылларга наар куолулаан таҕыстыбыт. Тыа хаһаайыстыбатын боппуруоһугар барытын өйдүүбүт да, хардыылыыртан саллабыт. Тыа хаһаайыстыбатыгар улахан ситиһиибит суох. Сылгыбыт тулуктаһар да, сылгыбыт айылҕаттан, кыстыктан тутулуктаах. Тыа сиригэр сылдьан боростуой үлэһиттэри, салайааччылары, бэтэрээннэри да кытта көрүстүм. Онон ити олохсуйбут систиэмэни уларытар кэм кэллэ. Уопсайынан, билигин федеральнай сокуоннар өттүлэриттэн аһылык хаачыстыбатыгар Арассыыйаттан ирдэбиллэр бааллар. Урукку курдук хотоҥҥо ынаҕы илиигинэн ыан баран, үүтү туттарбаккын. Үүтү тутууга субсидия курдук биэриигэ тэрээһиннээх хаһаайыстыбалар баар буолуохтаахтар. Оттон кэтэх хаһаайыстыбаларга сүөһү төбөтүгэр субсидия биэриэхтээхпит. Бырабыыталыстыбаҕа биэрбит соругум – төрүүр ынах төбөтүгэр 35 тыһыынча солкуобай, үүккэ биир лиитирэтигэр – 50 солкуобай. Бу тыа хаһаайыстыбатын сайыннарарга улахан хамсааһынынан буолуо этэ. Тыабыт хаһаайыстыбатын сайыннара сатыахтаахпыт. Тыа сиригэр сылдьан эдэр дьон, саастаахтар даҕаны улахан хаһаайыстыбалары тэринэн, тэрээһиннээхтик үлэлии сылдьалларын, сайдар баҕалаахтарын көрөбүн. Урут көмөҕө үбү чэбдигирдии бырагырааматынан 100 эрэ төбө сүөһүлээх хаһаайыстыба сөп түбэһэр буоллаҕына, быйылгыттан 25 төбөҕө диэри түһэрдибит. Оччоҕуна элбэх хаһаайыстыба көмөҕө тиксиэ этэ.
Бэлэмнээтэ Женни Стрюкова.