Бу күннэргэ Сунтаарга Бэйэ оҥорон таһаарыы сылын түмүктээн, Экология уонна Доруобуйа сылын көрсө улууспут ситиһиилээх дьонун чиэстээтибит.
edersaas.ru
Бу үөрүүлээх тэрээһиҥҥэ Сунтаарга түөрт оҕону баһаартан быыһаабыт 4 кылаас үөрэнээччитэ Ариан Алексеевка РФ наҕараадатын туттаралларыгар бар дьон сүһүөҕэр туран уруйдаата, сорохтор уйадыйан харахтарын уута таҕыста.
Сыл устата спортка, култуураҕа, үөрэҕириигэ, тыа хаһаайыстыбатыгар туһаайыллыбыт «Олоҥхо дойдутун оһуордаах оонньуута» нэһилиэктэр икки ардыларыгар куоталаһыы тэриллэн маннык түмүктээх буолла: 1 миэстэ Хоро (кыра нэһилиэктэргэ), Маар Күөл (орто), Кутана (улахан); 2 миэстэни Түбэй, Дьаархан, Элгээйи, 3 миэстэни Илимниир, Кэмпэндээйи, Сиэйэ нэһилиэктэрэ буоллулар.
Ону таһынан, былырыыҥҥыттан улууска «Сыл бастыҥ баһылыктара» бэлиэтэнэр буолбуттара. Кыайыылаахтарынан Илимниир баһылыга Иппатий Иванов, Аллыҥа баһылыга Николай Спиридонов, Күндэйэ баһылыга Виталий Константинов ааттанан 50.000 солк. наҕараадаланнылар, 2 миэстэни Түбэй баһылыга Герман Данилов, Кэмпэндээйи баһылыга Александр Игнатьев, Сунтаар баһылыга Эдуард Филиппов буолан 30.000 солк., 3 миэстэни Туойдаах баһылыга Владимир Анисимов, Хадан баһылыга Андрей Оконешников, Тойбохой баһылыга Иван Попов буоланнар 20.000 солк. бириис туттарылыннылар.
Түмүккэ, бары күргүөмүнэн туран, Леонид Попов 100 сылын бэлиэтээн «Сунтаар миигин ыҥырар» диэн ырыаны доргуччу ыллаан тэрээһиммитин түмүктээтибит!
Мария Кобельянова-Тускулаана, Сунтаар, edersaas.ru