СӨ Ил Дархана Айсен Николаев Суһал ыстаап мунньаҕар, пандемия кэмигэр Саҥа дьыллааҕы бырааһынньыгы ыытыы быраабылата оҥоһулла сылдьарын туһунан иһитиннэрдэ.
Ил Дархан эрэгийиэн бырабыыталыстыбатыгар туһааннаах структуралары кытары Саҥа дьыллааҕы бырааһынньыгы ыытыыга этиилэри киллэрэргэ сорудахтаата. Маны таһынан, хааччахтааһын миэрэлэрин хайаан да тутуһары бэлиэтээн эттэ. Сүрүн болҕомтону социальнай дистанцияны уонна харыстанар маасканы кэтии эрэсиимин тутуспат түүҥҥү кулууптарга уонна да атын тэрилтэлэргэ ууруллуохтааҕа этилиннэ.
Айсен Николаев Өлүөхүмэ, Аллайыаха уонна Анаабыр улуустарыгар кытаанах эпидемиологическай балаһыанньа үөскээбитинэн,бу улуустарга хонтуруолу күүһүрдэргэ дьаһайда. Арктическай улуустарга ыарыы саҥа тарҕанан эрэр буолан, мэдиктэр коронавируһу утары охсуһууга бэлэмэ суох буолуохтарын сөп.
Маны таһынан Ил Дархан ОРВИ-тан уонна кирииптэн вакцинациялааһын иккис түһүмэҕин кылгас болдьох кэм иһигэр ыытарга сорудахтаата. Быһыы саҥа баартыйата ааспыт субуотаҕа Саха сиригэр аҕалыллыбыта. 160 тыһыынча дозаны улуустарынан тарҕатыахтара.
Сүбэ мунньах кэмигэр өрөспүүбүлүкэ кылаабынай санитарнай бырааһа Маргарита Игнатьева, коронавирус анаалыһын түмүгүн кэтэһии хас да хонугунан аҕыйаабытын эттэ. Ол иһигэр хоту улуустарга. Бу улуустар ИФА уонна ИХА анаалыһыгар көспүттэрэ. Саха сирин лабораториялара күнүстэри-түүннэри үлэлииллэр. Ааспыт нэдиэлэҕэ 41 886 тест оҥоһулунна.
Доруобуйа харыстабылын миниистирэ Елена Борисова телемэдиссиинэ көмөтүнэн дойду атын медицинскэй тэрилтэлэрин кытары сүбэ-ама ылыы улааппытын бэлиэтээтэ. Кини эппитинэн, федеральнай экспертэр олохтоох быраастар билиилэрин-көрүүлэрин үрдүктүк сыаналыыллар.
СӨ Ил Дарханын уонна Бырабыыталыстыбатын пресс-сулууспата