Ил Дархан бүгүн суһал ыстаапка уочараттаах мунньаҕы тэрийэн ыытта.
Хоруона хамсыгын бохсууга туһаайыллыбыт мунньах куйаар ситиминэн барда. Айсен Николаев бу мунньахха өрөспүүбүлүкэҕэ эпидемиологическай быһыы-майгы син биир уустугун бэлиэтээтэ. Ааспыт сууккаҕа COVID-19 дьаҥар 132 киһи хаптарбыт, итинтэн 85 киһи Дьокуускай куоракка олорор.
Эпидемиологическай быһыыны-майгыны бохсор, бигэтитэр уонна дьаҥы-дьаһаҕы намтатар, ыарахан туруктаах ыарыһахтарга бириэмэтигэр көмөнү оҥорор туһуттан, куораттар уонна улуустар инфекционнай балыыһаларыгар куойкалары эбиини көрөр туһунан бэлиэтээн этилиннэ. Өссө биир сүрүнүнэн, өрөспүүбүлүкэ аптекаларын уонна мэдиссиинэ тэрилтэлэрин эминэн-томунан хааччыйыыга болҕомтону күүһүрдэргэ соруйулунна.
Вице-премьер, коронавирус дьаҥын бохсууга үлэлэһэр суһал ыстаап салайааччытын солбуйааччы Ольга Балабкина Ил Дархан сорудаҕын толорон, дьон-сэргэ туттарар анаалыстарын болдьоҕун кылгатарга, лабораториялар күүстэрин кэҥэтии боппуруоһа быһаарыллыбытын эттэ. Маны сэргэ, ПЦР лабораторияларыгар ноҕоруусканы кыччатан, анаалыстар ИФА уонна ИХА ньымаларынан оҥоһуллалларын иһитиннэрдэ. Онуоха, өрөспүүбүлүкэ үрдүнэн анаалыстар түмүктэрин биэрии түөрт күнтэн тахсыа суохтаах диэтэ.
СӨ Роспотребнадзор управлениетын салайар Маргарита Игнатьева бэлиэтээбитинэн, 100 тыһыынча нэһилиэнньэҕэ ПЦР тест оҥоһуллуута өрөспүүбүлүкэ үрдүнэн 502,2 тыһ, тиийбит. Бу дойдуга бастыҥ көрдөрүү диир кини.
Доруобуйа харыстабылын миниистирэ Елена Борисова өрөспүүбүлүкэ үрдүнэн барыта 2 518 куойка, өрөбүл күннэргэ Дьокуускайга, Алдаҥҥа, Мэҥэ Хаҥаласка, Мииринэйгэ, Нерюнгрига, Ньурбаҕа, Тааттаҕа, Хаҥаласка куойкалар эбиллибиттэрин эттэ.
Өрөспүүбүлүкэ киин куоратыгар өрөбүл күннэргэ 264 эбийиэги бэрэбиэркэлээбиттэр. Итинтэн 55-гэр кэһиилэр булуллубуттар. Айаҥҥа сылдьыыттан 14 оптуобус туоратыллыбыт. Хонтуруоллуур эриэйдэҕэ атыы-тутуу эбийиэктэригэр кэһиилэр эмиэ бааллара бэлиэтэммит. Суут быһаарыытынан, 30 күҥҥэ биир кафе, фудкорт уонна бар үлэлэрэ тохтотуллубуттар. Бу туһунан Дьокуускай куорат баһылыга Сардаана Авксентьева иһитиннэрдэ.
СӨ ИДьМ миниистири солбуйааччы Константин Неустроев уопсастыбаннай сирдэргэ мааската суох сылдьар дьону быһаарыыга рейдэлэр тиһиктээхтик салҕаналларын, ирдэбили тутуспат дьон административнай эппиэтинэскэ тардыллалларын эттэ.
Өрөспүүбүлүкэтээҕи суһал ыстаап мунньаҕар Айсен Николаев хонтуруоллуур-кэтээн көрөр тэрээһиннэр миэрэлэрэ сабыдыаллаах, көдьүүстээх буолуохтаахтарын тоһоҕолоото.
СӨ Ил Дархан уонна Бырабыыталыстыба пресс-сулууспата
Андрей Сорокин (СИА) хаартыскаларга түһэриитэ
+1
+1
+1
+1
+1
+1
+1