Бүгүн өрөспүүбүлүкэтээҕи суһал ыстаап чилиэннэрэ СӨ Бырабыыталыстыбатын бэрэссэдээтэлин солбуйааччы Ольга Балабкина салайыытынан ыытыллыбыт мунньахха колл-кииннэргэ үлэлиир исписэлиистэр хамнастарын төлөбүрүн уонна поликлиникаларга көмөлөһөр амбулаториялары тэрийии тустарынан уонна да атын тыын суолталаах боппуруостар көрүлүннүлэр.
Ольга Балабкина СӨ Доруобуйа харыстабылын министиэристибэтигэр Дьокуускайдааҕы колл-кииҥҥэ түүннэри-күнүстэри үлэлии сылдьар исписэлиистэр хамнастарын төлөбүрүн түргэтэтэргэ сорудахтаата. Ону тэҥэ, Физическэй култуураҕа уонна успуорка министиэристибэтин кытта бу күннэргэ успуорт тэрилтэлэригэр биир кэлим амбулаториялары тэрийэр сөптөөҕүн утатылыппакка быһааралларыгар эттэ.
Мунньахха хааччыйар тэрилтэлэр саппаас быһыытынан уурулла сытар эми-тому мэдиссиинэ тэрилтэлэригэр суһаллык тиэрдэллэрин ыйдылар. Манна оҕолорго аналлаах интэринээттэр бастакы уочарат хабыллыахтаахтар. Ону тэҥэ, Физическэй култуура уонна успуорт, Култуура уонна духуобунаһы сайыннарыы, Үөрэх уонна наука министиэристибэлэрэ Ил Дархан Ыйааҕар этиллибит маассабай тэрээһиннэри хааччахтааһыны кытаанах хонтуруолга ылаллара быһаарылынна. Улуус, нэһилиэк дьаһалталара ити миэрэни күүскэ тутуһуохтаахтара ыйылынна.
edersaas.ru