Бэҕэһээ муус устар 8 күнүгэр СӨ экэниэмикэҕэ сайдыытын суһал ыстаабыгар эминэн хааччыйыыны уонна тыа хаһаайыстыбатын өйөбүлүн көрдүлэр.
Мунньаҕы ыыппыт Айсен Николаев таһаҕаһы таһыыга суһал миэрэлэри ылыммыт бырабыыталыстыба уонна ыстаап чилиэннэригэр махтанна: «Тырааныспарга уонна кыһыҥҥы айан суолугар сөптөөх дьаһаллары ылына охсоммут, билигин уһун кэмҥэ тиийэр саппаастаахпыт, наадалаах аһы-үөлү уонна табаары аҕаллыбыт. Дьоммутугар-сэргэбитигэр бу олус суолталаах уонна экэниэмикэбит сайдыытыгар туһааннаах».
Ил Дархан этэринэн, Саха сиригэр билигин эмп-томп саппааһа баар, ол эрэн билигин тэрилтэлэри, аптекалары уонна ФАП-тары эминэн хааччыйар тиһиги оҥоруохтаахпыт.
Доруобуйа харыстыбалын миниистирэ Лена Афанасьева иһитиннэрбитинэн, амбулаторияларга уонна сытар балыыһаларга омук эмэ-томо 40 % ылар эбит. Сыана ортотунан 6-11 % үрдээбит. Билигин льготнай категориялаах тастан эмтэнэр ыарыһахтар эмтэрэ 3-13 ыйга, стационардарга —3-6 ыйга тиийэр.
Миниистир Арктика уонна аҕыйах нэһилиэнньэлээх пууннарга эмп тиийэригэр кэккэ моһоллор баалларын ыйда. Ил Дархан бырабыыталыстыбаҕа суһаллык миэрэ ылынан, эми-тому барытын бастакы уочарат тиэрдиллэр таһаҕас испииһэгэр киллэрэри дьаһайда. Министиэристибэ эминэн хааччыллыыны кыраҕытык хонтуруоллуохтаах.
Ас-үөл өттүнэн куттала суох буолууга Айсен Николаев Дьокуускайдааҕы уонна Ньурбатааҕы көтөрү иитэр фабрикаларга саҥа оборудование ылыллыахтааҕын бырабыыталыстыбаҕа дьаһайда. Тыа хаһаайыстыбын министиэристибэтигэр федеральнай биэдэмистэбилэри кытта ыкса үлэлэһэргэ сорудах биэрдэ.
Тыа хаһаайыстыбатын министиэристибэтэ иһитиннэрбитинэн, Дьокуускайдааҕы хлебокомбинакка 4,5 тыһ. бурдук атыылаһалларыгар 114,3 млн солк көрүллүбүт. Комбикормунан көтөрү иитэр фабрикалар уонна свинокомплекстар хааччыллыахтара, сааскы ыһыыга 2,5 тыһ туонна хортуопуйу уонна 1 тыһ тахса туонна минеральнай уоҕурдууну атыылаһыахтара. Нүөлсүтүүгэ эмиэ туспа үп көрүллүбүт.
СӨ Ил Дарханын уонна Бырабыыталыстыбатын Пресс-сулууспата
Андрей Сорокин хаартыската, СИА