Суһал ыстаап: Дьокуускай буруота, 7 ойуур баһаара умулунна, эбии баһаар күөдьүйдэ
От ыйын 31 күнүнээҕи чахчынан, Саха сиригэр 161 ойуур баһаара биллэр. Онтон 50 ойуур баһаарын умулларыыга үлэ барар.
СӨ Ил Дарханын уонна Бырабыыталыстыбатын пресс-сулууспата иһитиннэрбитинэн, ордук ыарахан балаһыанньа — Кэбээйи улууһун Сииттэтигэр уонна Үөһээ Бүлүү Кырыкыйыгар. Бу туһунан СӨ Бырабыыталыстыбатын бэрэссэдээтэлин солбуйааччы Дмитрий Садовников сарсыардааҥҥы брифиҥҥэ иһитиннэрдэ.
Баһаары умулларыыга 2218 киһи уонна 272 тиэхиньикэ үлэлиир. Суукка иһигэр 7 баһаары умуллардылар. 21 эбии ойуур баһаара күөдьүйдэ. ЫБММ икки Ми-8 бөртөлүөтэ Хаҥалас уонна Кэбээйи улуустарыгар үлэлээтэ. Тыал буруону Мииринэй уонн Дьокуускай куораттарга туһаайда. Мииринэйгэ буруоттан сылтаан РФ уонна Арассыыйа ЫБММ Оборонаҕа министиэристибэтин авиацията үлэлээбэккэ турар.
Дьокуускайга бу сарсыардааҥҥы буруо Нам уонна Горнай улуустарыттан кэллэ. Гидрометкиин бэлиэтииринэн, оптуорунньукка диэри буруо сүтүө суоҕа. Манан сибээстээн, вице-премьер дьону таһырдьа тахсыбаккытыгар уонна Роспотребнадзор, мэдиссиинэ үлэһиттэрин сүбэлэрин толоро сылдьаргытыгар сүбэлиир.
Елена ПОТОЦКАЯ, «Саха сирэ» хаһыат, edersaas.ru