2018 сыл бэс ыйын 14 күнүттэн «Суһал көмөнү» ыҥырыы төлөбүрдээх буоларыгар В.Путин Ыйааҕа таҕыста диэн сурах оруна суоҕун СӨ Доруобуйа харыстабылын министиэристибэтэ бигэргэттэ.
edersaas.ru
«Дьон-сэргэ РФ Доруобуйаҕа харыстабылын министиэристибэтэ суһал көмөнү оҥоруу быраабылаларыгар уларыйыылары киллэрии туһунан 22.01.2016. 33 №-дээх уурааҕын эрэдээксийэтин сыыһа өйдөөбүт буолуон сөп. Саҥа эрэдээксийэҕэ «суһал көмө» үлэһиттэригэр көрүллэр ирдэбилгэ уларыйыылар киллэриллибиттэрэ», – диэн быһаардылар.
Онон, министиэристибэ социальнай ситимнэргэ тахсар араас саарбах сурахтарга итэҕэйбэккитигэр ыҥырар.
ЫСПЫРААПКА:
2016 с. уураах быһыытынан уларыйыылар биригээдэ састаабыгар киллэриллибиттэрэ. Холобур, урут «суһал көмө» биригээдэтигэр медицинскэй сиэстэрэлэр киирбэттэр этэ. Саҥа быраабыланан биригээдэҕэ хайаан да сиэстэрэ баар буолуохтааҕа ирдэниллэр.
Надежда ЕГОРОВА, «Саха сирэ» хаһыат, edersaas.ru