Саха сиригэр суһал мэдиссиинискэй көмө сулууспата тэриллибитэ 90 сыла туолла.
Ахсынньы 10 күнүгэр СӨ бырабыыталыстыбатын бэрэссэдээтэлин солбуйааччы Ольга Балабкина уонна СӨ доруобуйа харыстабылын миниистирин э.т. Лена Афанасьева бу кэрэ-бэлиэ күнүнэн эҕэрдэлээн, сулууспа үлэһиттэригэр Арассыыйа уонна өрөспүүбүлүкэ таһымнаах судаарыстыбаннай уонна биэдэмистибэ наҕараадаларын туттардылар.
«Күн бүгүн Суһал мэдиссиинискэй көмө ыстаансыйата мэдиссиинэ биир улахан тэрилтэтинэн буолар. Сулууспа сүрүн соруктара уларыйбаттар. Ол -– хаачыстыбалаах суһал уталытыллыбат мэдиссиинискэй көмөнү оҥоруу», -– диэн Лена Афанасьева эҕэрдэтин тириэртэ.
«Суһал көмө» сулууспата нэһилиэнньэ доруобуйатын туһугар инники кирбиигэ сылдьар. Ааттыын да суһал идэ, бу сулууспа хас биирдии үлэһититтэн идэҕэ бэриниини уонна баар кыаҕы толору туһаныыны ирдиир.
Суһал мэдиссиинискэй көмө сулууспатыгар 1200-тэн тахса исписэлиис күннэри-түүннэри түбүгүрэр. Күн аайы ыксаллаах ыҥырыыга 70-тан тахса дьуһуурунай уонна реанимация биригээдэлэрэ сүүрэллэр, сыл аайы 150 тыһыынчатан тахса ыҥырыыга хаачыстыбалаах өҥөнү оҥороллор.
Надежда ЕГОРОВА, «Саха сирэ», edersaas.ru
Хаартыскалар — министиэристибэ пресс-сулууспатыттан