Суһал көмө мэдиссиинэтин киинин кылаабынай бырааһа Иван Иванов быһа эпииргэ таҕыста
Суһал көмө мэдиссиинэтин киинин кылаабынай бырааһа Иван Иванов «Одноклассники» уонна «Вконтакте» социальнай ситимнэртэн быһа эпииргэ тахсан, дьон ыйытыыларыгар хоруйдаата. Ол иһигэр биир сүрүн ыйытыы вакцина туһунан буолла. Онно маннык эппиэттээтэ:
— Мин коронавирус утары быһыыны ыларга сүбэлиибин. Аан дойдуга баар баһаам элбэх ыарыыны вакцина эрэ көмөтүнэн кыайбыппыт. Ыарыы утары быһыыны эрдэ ылбыт киһи иммуннай систиэмэтэ дьаҥ кэллэҕинэ бэлэм буолар — кириип да буоллун, коронавирус да буоллун. Оннооҕор ыарыйдаххытына даҕаны, быдан чэпчэкитик аһарыныаххытын сөп. Мин сыл аайы кириип, ОРВИ утары вакцинаны ылабын, онтон COVID-19 ыарыыттан быстарар уочаратым кэллэҕинэ хайаан даҕаны ылыаҕым.
Ону таһынан быраас маасканы кэтии, санитарнай нуормалары тутуһуу улахан суолталааҕын туһунан эбии санатта:
— Билигин COVID-19 ыарыыттан харыстанар биир эрэ ньыма баар: ыалдьыбыт киһиттэн тэйиччи сылдьыы. Дьону кытта алтыһары аччатан, илиини куруутун суунан, маасканы кэтэн эрэ ону ситиһиэххэ сөп.
«Саха сирэ» хаһыат, edersaas.ru