«Суһал көмөнү» оҥорор «С» кылаастаах саҥа көлөлөр Саха сиригэр кэллилэр.
СӨ Доруобуйаҕа харыстабылын министиэристибэтин пресс-сулууспата иһитиннэрбитинэн, өрөспүүбүлүкэҕэ федеральнай үбүнэн ылыллыбыт үс көлө кэлбит. Маны таһынан, өссө аҕыс реанимобиль кэлиэхтээх.
—Саҥа көлөлөр өрөспүүбүлүкэ олохтоохторугар мэдиссиинискэй көмөнү оҥоруу хаачыстыбатын тупсарыахтара. Саҥа реанимобиллар Бүлүүгэ, Ленскэйгэ уонна Мииринэйгэ ыытыллаллар, — диэн министиэристибэттэн иһитиннэрбиттэр.
Санатан эттэххэ, «суһал көмө» массыыналара РФ премьер-миниистирэ Михаил Мишустин дьаһалын чэрчитинэн ылыллыбыттар. Дойду субъектарын икки ардыларыгар үллэриинэн, Саха сирэ 11 маннык көлөҕө тиксибит.
Бу иннинэ РФ Бырабыыталыстыбата бэйэтин эрэсиэрбэтиттэн 5,2 млрд солк. үбү РФ эрэгийиэннэрэ «суһал көмө» көлөлөрүн ылалларыгар анаммыт. Бу туһунан sakha.gov.ru суруллар.