«Студвесна-2023» сүрүн хайысхатыгар Саха сирин хамаандата бастаата

Бөлөххө киир:

Эдэр киһи тыла тиийэр, санаабыт санаата салаллар, туппута тупсар. Ыам ыйын 26 күнүттэн бэс ыйын 1 күнүгэр диэри Пермь куоракка Бүтүн Арассыыйатааҕы «Российская студенческая весна» бэстибээл буолан ааста. Дойду 70 эрэгийиэниттэн 3500 устудьуон кыттыыны ылла. 

Саха сирин чиэһин Хотугулуу-Илиҥҥи федеральнай университет, Култуура уонна искусство Арктикатааҕы института уонна Арктикатааҕы агротехнологическай университет  үрдүк таһымҥа көмүскээтилэр. Тэрээһиҥҥэ «На крыльях» весны диэн бырагырааманы көрдөрдүлэр. «Региональная программа» диэн тэрээһин сүрүн анал аатыгар Гран-при хаһаайыннара буоллулар!

Култуура уонна искусство институтун устудьуоннара Гаврил Никутов, Оргилбаяр Нямжав, Адилет Эмилбек-Улуу стрит — арт, үҥкүү уонна муусука хайысхаларыгар ситиһиилээхтик кыттан кэлбиттэриттэн астыналлар, киэн тутталлар. Быйыл 300 сааһын туолбут Пермь куораты сөбүлээбиттэр, ыалдьытымсаҕын бэлиэтииллэр. Кинилэр санааларыгар, саха ыччатын нүөмэрдэрин көрөөччүлэр ылыммыттар, өйдөөбүттэр, сэҥээрбиттэр.

 «Российская студенческая весна» бэстибээл — Арассыыйатааҕы Ыччат Сойууһун уонна «Россия – страна возможностей» платформа холбоһуктаах бырайыактара. Эһиил «Студвесна» Саратов куоракка буолуоҕа  диэн билиннэ. Онно эмиэ Саха сирин сайдам ыччата көхтөөх кыттыыны ылыа диэн эрэнэбит, күүтэбит!

+1
6
+1
0
+1
0
+1
0
+1
0
+1
0
+1
0