Саха Өрөспүүбүлүкэтин Ил Дархана Егор Борисов кулун тутар 21 күнүгэр Айаал Егиновы «Стройсельгазификация» судаарыстыбыннай хампаанньа генеральнай дириэктэринэн анаата.
Айаал Егинов 1984 сыллаахха ыам ыйын 3 күнүгэр Амма сэлиэнньэтигэр күн сирин көрбүтэ. 2006 сыллаахха «Урааллааҕы судаарыстыбыннай техническэй үнүбүрсүтүөт» тутуу факультетын бүтэрэн «итиинэн-гаһынан хааччыйыы уонна вентиляция» идэтин ылбыта.
2015 сыллаахха президентскай бырагыраама чэрчитинэн, М.К. Аммосов аатынан ХИФУ «урбаан сайдыытын салайар» идэҕэ үөрэммитэ.
2006-2007 сс. — «Якутгазсервис» ХЭУо-ҕа оҥорон таһаарыы техническэй отделын инженеринэн үлэлээбитэ.
2006-2009 сс. — М.К. Аммосов аатынан ХИФУ Инженернай-техническэй факультетыгар уһуйааччынан үлэлээбитэ.
2007-2018 сс. — «Сахатранснефтегаз» АУо-ҕа 1 категориялаах исписэлиистэн саҕалаан араас салайар дуоһунастарга тиийэ үлэлээбитэ.
«Айаал Егинов 12 сыл устата гаас эйгэтигэр үлэлээн улахан уопуттаах. Саха Өрөспүүбүлүкэтин салайар кадрдарын эрэзиэрбэтигэр баар», — диэн Ил Дархан уонна Бырабыыталыстыба дьаһалтатын кадрдарга департамена бэлиэтээтэ.
Санатан эттэххэ, «Стройсельгазификация» иннинээҕи дириэктэрэ Евгений Рожин бэрик ылыыга балыллан, силиэстийэлэнэ сылдьар.
Николай Попов, «Саха сирэ» хаһыат, edersaas.ru