РФ бырабыыталыстыбата бэрэсидьиэн дьаһалынан үлэ кэмигэр коронавируска сутуллубут миэдиктэргэ страховой төлөбүр көрүллэрин туһунан былааны оҥордо. Төлөбүр кээмэйэ уонна ханнык түгэҥҥэ бэриллэрэ бэрэсидьиэн 313-с №-дээх ыйааҕынан бигэргэтилиннэ.
СӨ Доруобуйа харыстабылын миниистирэ Елена Борисова быһаарарынан, төлөбүрү быраастар, орто, алын медперсонал, «суһал көмө» суоппардара ылар кыахтаахтар. Бу туһунан СӨ доруобуйа харыстабылын министиэристибэтин пресс-сулууспата иһитинэрэр.
Ыйаахха ыйыллыбытынан, маннык суумалаах харчы төлөнөр:
— миэдик ыалдьан үлэҕэ тахсыбат түгэнигэр төлөбүр 68,8 тыһыынча солкуобай буолар;
— миэдик коронавирустан ыалдьан өлөр түгэнигэр, кини дьиэ кэргэнигэр 2,7 мөлүйүөн солкуобай төлөнөр;
— миэдик ыалдьан баран кыайан үлэлиир кыаҕа суох, инбэлииккэ тахсар түгэнигэр төлөбүр: III-с группалаах инбэлииттэргэ — 688 тыһыынча солкуобайга, II-с группалаах инбэлииттэргэ — 1,3 мөлүйүөн солкуобайга, I-кы группалаах инбэлииттэргэ — 2 мөлүйүөн солкуобайга тэҥнэһэр.
Саха сиригэр биир миэдик ыалдьан сатаан үлэҕэ тахсыбат буолан, төлөбүрү ылбытын туһунан Елена Борисова иһитиннэрэр.
edersaas.ru
Хаартыска — finance.rambler.ru