Эрэдээксийэҕэ А. Ивановтан «Мин ИП арыйбытым даҕаны, урбаанынан дьарыктамматым кэриэтэ. Страховой усунуоһу төлүөхтээхпин дуо?» диэн ыйытыы киирдэ. Тустаах тэрилтэттэн хоруй ыллыбыт.
Ыйытыыга Арассыыйа ФНС СӨ оройуоннар икки ардыларынааҕы 5 №-дээх иниспиэксийэтин нолуогу төлөөччүлэри кытта үлэҕэ отделын нолуокка кылаабынай иниспиэктэрэ Елена Слепцова маннык хоруйдаата:
— Нолуок тиһигиттэн, наймыламмыт үлэһиттэрдээхтэриттэн уонна хайдах үлэлииллэриттэн (ночооттоохтук эбэтэр олох да дьарыктамматтар) тутулуга суох бары биирдэм урбаанньыттар кинилэргэ олохтоммут страховой усунуоһу төлүөхтээхтэр. Бу усунуостарын ахсынньы 31 күнүгэр диэри төлүүллэрэ ирдэнэр. 2019 сылга олохтоммут кээмэйинэн страховой усунуос кээмэйэ — 36238 солкуобай (о.и. булгуччулаах биэнсийэ страховкатыгар – 29354 солк., булгуччулаах мэдиссиинэ страховкатыгар – 6884 солк.). Оттон урбаанынан дьарыктанан бүттэххитинэ, нолуок уорганыгар биирдэм урбаанньыт быһыытынан учуоттан уһулларга сайабылыанньа суруйуохтааххыт.
Женни Стрюкова, edersaas.ru
Хаартыска: интэриниэттэн.