Аан дойдуга СПИД ыарыыттан өлбүттэри кэриэстиир күн чэрчитинэн, Бүтүн Арассыыйатааҕы “Стоп ВИЧ/СПИД” аахсыйа ыытыллар. Манна ВИЧ-инфекцияны, вируснай В гепатиты, вируснай С гепатиты, сифилиһи булар босхо суһал тест-бэрэбиэркэни ааһыахха сөп. Бу киһи доруобуйатыгар кутталлаах ыарахан ыарыылар төһөнөн эрдэ булуллаллар да, соччонон эмтэнии көдьүүстээх буолар.
Аахсыйаны “СПИД-киин”, “Миэдик волонтердар”, Дьокуускайдааҕы мэдиссиинэ колледжа, мединститут инфекционнай ыарыыларга, фтизиатрияҕа, дерматовенерологияҕа кафедрата кыттыһан ыыталлар.
Ханна, хаһан бэрэбиэркэлэниэххэ сөбүй?
Ыам ыйын 14-15 күннэригэр: “Туймаада” атыы-эргиэн дьиэтин (Орджоникидзе уул, 38-һа) 1-кы этээһигэр – сарсыарда 11 чаастан күнүс 4 чааска диэри.
“Ураса Молл” атыы-эргиэн дьиэтин (Өктөөп 50 сыла автострада, 6-та) 1-кы этээһигэр — сарсыарда 11 чаастан күнүс 4 чааска диэри.
Комсомольскай болуоссакка мобильнай киин үлэлиэҕэ – күнүс 12 чаастан 3 чааска диэри.
Анаалыһы тарбахтан ылаллар, туох баар санитарнай миэрэлэри тутуһаллар, биирдэ эрэ туттуллар, стерильнэй үнүстүрүмүөннэри уонна түмүгүн 96% чуолкайдык көрдөрөр омук суһал-тестэрин туһаналлар. 10-15 мүнүүтэнэн анаалыс түмүгэ биллэр. Бэрэбиэркэлэнэр киһи 18 сааһын туолбут буолуохтаах.
Ангелина Васильева, “Саха сирэ” хаһыат, edersaas.ru
Хаартыска: СИА.