Бу дьыл ыам ыйын 13 күнүгэр “На вахту14” саайт нөҥүө иккис бөлөх хомуллан Нерюнгригэ “Колмар” тэрилтэҕэ чох хостооһунугар үлэлии өрөспүүбүлүкэ араас улуустарыттан ыччат дьон барбыттара.
Олор истэригэр тиэхиньиичэскэй үөрэхтээх дьон кытта үлэлии барбыттар. Бу баахтанан үлэ буолбатах. Уопсайа 6 274 киһи учуокка турбутуттан 560 киһи аҕыйах ыйдаах анал кууруска үөрэнэн бастайааннай үлэҕэ ананна. “На вахту 14” бырайыак уонна “ПРОконсолидация – Якутия” бырайыак салайааччыта Петр Чехордун көҕүлээһининэн 35 cаастарыгар диэри саастаах эдэр дьон үлэлии тиийдилэр. Бу бырайыагынан Нерюнгригэ чох хостооһунугар үлэлии тиийбит Мэҥэ Хаҥалас Майатыттан сылдьар Степан Соловьевтуун кэпсэттибит.
БЫРАМЫЫСЫЛАННАҺЫ УРУККУТТАН СЭҤЭЭРЭРИМ
Мэҥэ Хаҥалас улууһун Майа сэлиэнньэтиттэн төрүттээхпин. Оробуочай уонна проходчик идэтигэр үөрэнэн бу ыам ыйын 13 күнүгэр үлэлии кэлбитим. Уопсайа уон үһүө буолан кэлбиппит. Мин сааһым 35, кэргэним, оҕолорум суох буолан, хомуллан үлэлии кэлэрбэр судургутук быһаарыммытым. Бэйэм бу иннинэ Бэстээххэ тимир суол вокзалыгар богуоннар табаардарын ааҕааччынан үлэлии сылдьыбытым.
Уруккуттан бырамыысыланнаска үлэни сэҥээрэрим. Бу «Колмар» тэрилтэҕэ үлэлиэн баҕалаахтары үөрэтэллэрин туһунан аан бастаан “Инстаграм” социальнай ситимҥэ көрбүтүм. Бу быстах үлэ буолбатах, бастайааннай үлэ. Онон барыта сокуонунан үлэ киниискэтигэр толоруллар, уоппуска төлөнөр. Тэрилтэбит аата “Колмар” диэн. Биһиги Нерюнгри чугаһыгар Чульман диэн сиргэ баарбыт.
Кэлээппитин кытта уопсайга олохтообуттара. Биирдии хоско алталыы, сэттэлии буолан олоробут. Уопсайга остолобуой үлэлиир эбит, онно бэйэбит харчыбытыгар аһыыбыт. Ону таһынан, хоспутугар эмиэ астанан аһыахпытын сөп.
Мин кэлиэхпиттэн уон икки симиэнэ үлэлээтим. Алталыы чаас үлэлиибит. Анал таҥаспытын тэрилтэ суотугар босхо биэрбиттэрэ. Сир анныгар шахтаҕа балтараа км аллараа киирэн үлэлиибит. Билигин сэттэ сыл саппааска сыппыт сиргэ бэлэмнэнии үлэтин оҥоро сылдьабыт. Уопсайга бэрээдэк үчүгэй, комендант, харабыл баар. Кэлии дьонтон украинецтар эҥин бааллар.
Мин бу үлэҕэ уопут ылаары кэлбитим. Онтон салгыы олох көрдөрөн иһиэ. Киһи үлэҕэ-хамнаска уопутурара туох куһаҕаннаах буолуой. Саха дьоно төрөөбүт дойдубутугар бырамыысыланнас сайдыытыгар үлэлиэхтээхпит дии саныыбын.
Ульяна Захарова.
Хаартыскалар Степан Соловьев
тус архыыбыттан туһанылыннылар.