Степанида Артахинова Европа Гран-при күрэхтэһиитин боруонса призера буолла

Бөлөххө киир:

Арассыыйа успуордун үтүөлээх маастара Степанида Артахинова Турцияҕа ыытыллыбыт Европа Гран-при турнирыгар боруонса мэтээли ылары ситистэ. Күрэхтэһии муус устар 7-77 күннэригэр Анталия куоракка ыытылынна. Охчуттар уон араас дойдуттан кэллилэр.

Арассыыйа сүүмэрдэммит хамаандата бастаан Кемер куоракка тиийэн дьарыктаммыт. Салгыы Анталияҕа баран 16 охчут күрэхтэспит. Алта киһи блочнай оххо, уон киһи классическайга күрэхтэстилэр. Европа күрэхтэһиитигэр Германия, Франция, Италия, Турция, Польша, Эстония курдук дойдулартан кэлбиттэр.

— Бастакы эргиир кэнниттэн мин сэттис этим. Финал 1/16-гар эстонканы кытта көрсүбүтүм, салгыы бэйэм дойдум охчуттарын кытары ыппытым. Финал аҥаарыгар Арина Черкезоваҕа хоттордум. Боруонса иһин киирсиигэ Виктория Бальжанованы 139-136 ахсаанынан кыайбытым. Күрэхтэһии кэмигэр күүстээх тыал үрэн, туруккун ыһара. Бастакы күн ханан даҕаны тыала суох этэ. Финал кэмигэр тыал ардыгар 25 миэтирэ ыраахха диэри түргэннээх буолан ылара. Ол да буоллар, бэйэм кыттыыбыттан астынным. Таһырдьа номнуо үһүспүн кыттабын. Дубайга финаллаабытым, Алуштаҕа кыттыбытым. Онон, итии килиимэккэ, таһырдьа ытарга син үөрэнэн эрэбин. Биһиги дьарыкпыт үксүн дьиэ иһигэр буолар буолан, кыра да тыал үрдэҕинэ уолуйарым. Сүрүн күрэхтэһиибит бэс ыйыгар Чехияҕа буолара буолуо, — диэн Степанида үллэһиннэ.

Виктория Бястинова, edersaas.ru саайт, «Саха сирэ» хаһыат. 

Хаартыска — sakha.gov.ru

+1
0
+1
0
+1
0
+1
0
+1
0
+1
0
+1
0