Степан Васильев олоҕун үөрэтэр кэмпириэнсийэ буолла

Бөлөххө киир:

Кулун тутар 24 күнүгэр Дьокуускайга “Степан Васильев Саха Өрөспүүбүлүкэтин судаарыстыбаннаһа төрүттэниитигэр уонна сайдыытыгар, САССР уонна СССР көмүһү хостуур уонна ыарахан бырамыысыланнаһын сайыннарыыга оруола” диэн Бүтүн Арассыыйатааҕы научнай-практическай кэмпириэнсийэ буолла. Сорох кыттааччылар интэриниэтинэн холбоннулар.

Кэмпириэнсийэ үлэтэ саха чулуу уола, уһулуччулаах судаарыстыбаннай диэйэтэл Степан Васильевич Васильев кылгас эрээри, чаҕылхай олоҕор, киэҥ далааһыннаах үлэтигэр, төрөөбүтэ 125 сылыгар ананна. Кини олоҕун бүүс-бүтүннүү норуотугар, саҥа төрүттэммит өрөспүүбүлүкэ атаҕар туруутугар, сайдыытыгар анаабыта. Оччотооҕу эдэр салайааччылар Былатыан Ойуунускайы, Максим Аммосовы, Исидор Бараховы, Степан Аржаковы, уо.д.а. кытта бииргэ, бэриниилээхтик үлэлээбиттэрэ.

Степан Васильев дойдуга профсоюзнай хамсааһын төрүттэниитигэр улахан  оруоллаах. Кини ыарахан бырамыысыланнаһы, көмүһү хостооһуну сайыннарбыта. Ааспыт үйэ 30-с сылларыгар кини Өҥнөөх металлары, кыһыл көмүһү хостуур, таҥастыыр оробуочайдар профсоюзтарын киин кэмитиэтин салайбыта. Онтон ВКП(б) иһинэн партийнай хонтуруол кэмитиэтигэр ыарахан бырамыысыланнас бөлөҕүн салайбыта.

Степан Васильев өрөспүүбүлүкэ төрүттэниитигэр, кыһыл көмүһү хостуур бырамыысыланнас сайдыытыгар киллэрбит кылаата сүҥкэн. Кини “Якутзолото” союзнай трест биир төрүттээччитинэн буолар.

Кэмпириэнсийэҕэ СӨ бырабыыталыстыбатын бэрэссэдээтэлин солбуйааччы Сергей Местников тыл эттэ:

Саха биир уһулуччулаах судаарыстыбаннай диэйэтэлэ Степан Васильев саҥа тэриллибит өрөспүүбүлүкэ бастакы, эдэр, чаҕылхай салайааччыларыттан биирдэстэрэ буоларынан киэн туттабыт. Оччолорго кинилэр 20-25-30 эрэ саастаахтара. Хайдахтаах курдук эппиэтинэстээх, хорсун дьайыылары оҥорбуттарын, ырааҕы өтө көрөн, бэриниилээхтик үлэлээбиттэрин, Саха сирин интэриэһин көмүскээбиттэрин ааҕан, киһи сөҕөр-махтайар. Степан Васильев Саха сирин бырамыысыланнаһа төрүттэниитигэр улахан оруоллаах киһи. Олохтоох дьону бырамыысыланнаска үлэлэтиини кини оччолортон туруорсубута. “Золото –основной язык, на котором можно говорить на международном рынке” диэн кини этиитэ билигин да оруннаах. Саха норуотун чулуу уолаттарын олохторун, үлэлэрин үйэтитии, үүнэр көлүөнэҕэ тиэрдии – биһиги ытык иэспит буолар, 

Кэмпириэнсийэҕэ Ил Түмэн бэрэссэдээтэлин солбуйааччы Виктор Губарев, РФ горнай-металлургическай профсойууһун Киин сэбиэтин бэрэссэдээтэлэ Алексей Безымянных, Казаннааҕы университет научнай бибилэтиэкэтин отделын сэбиэдиссэйэ Эльмира Амирханова, Москваҕа СӨ Бастайааннай бэрэстэбиитэлистибэтин кылаабынай советнига Наталия Колодезникова, С.Васильев сиэн быраата Эдуард Данилов, Ньурба, Таатта, Нам, Үөһээ Бүлүү, Бүлүү, Алдан улуустарын салалталара, мусуой үлэһиттэрэ, устудьуоннар, үөрэнээччилэр, уо.д.а. кыттыыны ыллылар.

Кини олоҕун бүүс-бүтүннүү саҥа төрүттэммит өрөспүүбүлүкэ сайдыытыгар, үүнэр көлүөнэлэр тустарыгар биэрбитэ. С.Васильев далааһыннаах үлэтин сыаналаан, Ньурба куорат киин уулуссата, Алдан куоракка биир уулусса, Ньурбаҕа орто оскуола, теплоход уонна бөдөҥ алмаас кини аатын сүгэллэр. Ньурбаҕа уонна Дьокуускайга мэҥэ таастара тураллар, Москваҕа олорбут дьиэтигэр мемориальнай дуоска арыллыбыта.

Ангелина Васильева, «Саха сирэ» хаһыат, edersaas.ru

Хаартыска: sakhapress.ru

+1
0
+1
0
+1
0
+1
0
+1
0
+1
0
+1
0