Степан Саргыдаев “Биир ньыгыл Арассыыйа” баартыйа генеральнай сэбиэтигэр талылынна
Ааспыт субуоталаах өрөбүлгэ, тохсунньу 21 — 22 күннэригэр, Москваҕа “Биир ньыгыл Арассыыйа” баартыйа XVI отчуоттуур-быыбардыыр съеһэ ыытылынна. Бу туһунан INTERFAX.RU иһитиннэрэр.
Роман Попов, “Саха сирэ” хаһыат, https://edersaas.ru
Съезкэ баартыйа салалтатыгар уларыйыылар буолбатылар: Дмитрий Медведев өссө биэс сыл баартыйаны салайыаҕа, оттон Борис Грызлов Үрдүкү сэбиэт үлэтин салгыы сүрүннүөҕэ.
Судаарыстыбаннай Дуума спикерэ Вячеслав Володин “Биир ньыгыл Арассыыйа” Үрдүкү сэбиэтигэр киллэрилиннэ. Дуума урукку бэрэссэдээтэлэ, тас разведка сулууспатын салайааччы Сергей Нарышкин саҥа састаапка хаалларылынна.
Дагестан баһылыга Рамазан Абдулатипов, Госдума оборонаҕа кэмитиэтин салайааччы Владимир Шаманов, Нижегородскай уобалас губернатора Валерий Шанцев, Крым баһылыга Сергей Аксенов Үрдүкү сэбиэккэ киирдилэр. Алтыс ыҥырыылаах Госдума дьокутааттарыттан үгүстэрэ сэбиэт састаабыттан таһаарылынна.
Оттон баартыйа генеральнай сэбиэтин сэкирэтээрин дуоһунаһын Сергей Неверов тутан хаалла. Устаап быһыытынан, съезтэр икки ардыларыгар баартыйа үлэтин сүрүннүүр уорган 170 итэҕэһэ суох чилиэннээх буолуохтаах. Сабыылаах куоластааһынынан сэбиэт аҥарын курдуга саҥардылынна. Онно Госдума дьокутаата Сергей Железнягы, парламент социальнай хайысхаҕа кэмитиэтиттэн Андрей Исаевы, ФС оборонаҕа кэмитиэтин баһылыгын солбуйааччы Франц Клинцевиһы сэргэ Дуума быыбарыгар үчүгэйдик үлэлээбит баартыйа регионнааҕы, олохтоох уонна бастакы сүһүөх тэрилтэрин салайааччылара, ол иһигэр тутуу миниистирэ Михаил Мень, Крым бырабыыталыстыбатын урукку премьера Руслан Бальбек, Госдума дьокутаата Евгений Ревенко, уо.д.а. киллэрилиннилэр.
Саха Өрөспүүбүлүкэтин бэрэстэбиитэлэ — Чурапчы улууһун Чурапчы сэлиэнньэтин баһылыга, баартыйа Чурапчытааҕы олохтоох салаатын сэкирэтээрэ Степан Саргыдаев — испииһэккэ киллэриллэн, “Биир ньыгыл Арассыыйа” генеральнай сэбиэтин састаабыгар талылынна.
Хаартыскаҕа: Саха сирин делегацията.
Роман Попов, “Саха сирэ” хаһыат, https://edersaas.ru.ru