Степан Саргыдаев: «Бэс Күөлүгэр толору хааччыллылаах дьиэлэр тутуллуохтара!»

Айылҕа баһаарыттан 30-тан тахса олорор дьиэ умайбыт Бэс Күөлүгэр, саҥа дьиэлэри тутарга анаан сири ыраастааһыҥҥа, былааннааһыҥҥа киэҥ хабааннаах үлэлэр бара тураллар. Тутуу үлэтэ барыта өрөспүүбүлүкэ суотугар оҥоһуллуоҕа.

СӨ ыччат дьыалатыгар уонна социальнай коммуникация министиэристибэтин салайааччыта Степан Саргыдаев билигин бу сэлиэнньэ олохтоохторугар көмө оҥорууга сүрүн координатор быһыытынан үлэлии-хамныы сылдьар. Атырдьах ыйын 11 күнүттэн территорияны ыраастааһын үлэтэ саҕаланна, ону сэргэ тутуллуохтаах эбийиэктэри былааннааһын бара турар.
«Бүгүн күн анал тиэхиньикэ үлэлии сылдьар: сэттэ самосвал, икки байыаннай «Урал» массыына, икки бульдозер, биир экскаватор уонна икки погрузчик. Бүгүҥҥү күҥҥэ 3,5 тыһ. куб бөх тиэйилиннэ, уокка былдьаммыт сир 70% ыраастанна. Былааннааһын уонна ыраастааһын кэнниттэн олорор дьиэлэри тутуу үлэтэ саҕаланыа. Билигин чинчийэр үлэлэр саҕаланнылар. Былаан быһыытынан ыраастааһыны уонна былааннааһыны оптуорунньукка диэри бүтэриэхпитин баҕарабыт», — диэн Саргыдаев кэпсээтэ.

Тырааныспар министиэристибэтэ суол тутааччылары бу диэки суһал тэтиминэн үлэҕэ таһһарбыт, Тутуу министиэристибэтэ бэдэрээтинэн үлэлиир хампаанньалары ыыппыт. Ону тэҥэ   саллааттар бөх таһыытыгар үлэлии сылдьаллар. Координатор этэринэн олохтоох дьон дьиэлэр туруохтаах сирдэрин былаанныырга кытыннылар.

— Тутуу матырыйааллара олохтоохтору кытта көрсүһүүлэр түмүктэринэн талыллыбыттара – дьиэлэр саҥа германскай технологиянан тутуллуохтара. Дьиэлэр иэннэринэн эрэ уратылаах буолаллар – эрдэ умайбыт тутуулар кээмэйдэринэн. Олорор дьиэни таһынан тас тутуулары эмиэ көмө үп көрүүтүгэр учуоттуубут.

Саргыдаев этэринэн, бары дьиэлэр толору хааччыллыылаах (благоустроеннай) буолуохтара. Атын уокка былдьаммыт сирдэр эмиэ умайыы содулуттан ыраастаныахтара, Тыа хаһаайыстыбатын министиэристибэтэ умайбыт хотоннору сөргүтүүгэ үлэлэри саҕалаата.

— Билигин сүрүн кыһалҕа, дьону дьиэлээһин – кыһыммыт да кэлэрэ бэрт чугас. Уонна биллэн турар, сүөһү турар хотонноро эмиэ тымныы иннинэ тутуллуохтаахтар, — диэн түмүктээтэ Степан Саргыдаев.

«Саха сирэ» хаһыат, edersaas.ru

Хаартыска ЯСИА