Степан Саргыдаев: «Саха сирин талааннара» куонкурус кыайыылаахтара грант ылыахтара»

Балаҕан ыйын 27 күнүттэн өрөспүүбүлүкэбитигэр «Саха сирин талааннара» диэн талааннаах ыччаты, исписэлиистэри, салайар дьоҕурдаах дьону быһаарар, 2032 сылга диэри СӨ социальнай-экэнэмиичэскэй сайдыытын сыалларын ситиһэргэ анаммыт куонкурус саҕаламмыта.

Манан сибээстээн, бэҕэһээ СӨ Ыччат дьыалаларыгар уонна социальнай коммуникацияларга миниистирэ Степан Саргыдаев пресс-кэмпириэнсийэ ыытта. Манна кини 2009 сыллаахтан ыытыллар «Миниистир» дьыалабыай оонньуу саҥа таһымҥа тахсыбытын, аны уларыйбыт киэбинэн ыытылларын эттэ. «Бу оонньуу саҥардыллан улахан бырайыак буолла. Манна ыччат лиидэр хаачыстыбатын арыйыаҕа, сайдыаҕа», — диэн миниистир бэлиэтиир.

«Саха сирин талааннара» куонкуруска Саха сирин 18-45 саастаах олохтоохторо кыттыахтарын сөп. Кыттааччылары үс бөлөххө араарыахтара: «А» бөлөх — 18-22 саастаахтар, «В» бөлөх — 23-35 саастаахтар, «С» бөлөх — 36-45 саастаахтар. Куонкуруска былырыыҥҥы «Миниистир» оонньуу кыайыылаахтара кыттыбаттар.

Куонкурус түөрт түһүмэҕинэн ыытыллыаҕа. «Пандемия буолан, түһүмэхтэр тэйиччиттэн (дистанционнайдык) ыытыллыахтара. Бастакы түһүмэх балаҕан ыйын 27 күнүгэр саҕаламмыта. Билигин алтынньы 26 күнүгэр диэри регистрация, сайаапкалары хомуйуу буола турар. Иккискэ кыттааччылар тургутук толоруохтара», — диэн Степан Анатольевич этэр.

Иккис түһүмэххэ тэйиччиттэн кыттааччылар лиидэрдии хаачыстыбаларын, чинчийэр дьоҕурдарын, олоххо сыаннастарын уонна уопсай билиилэрин тургутан көрүөхтэрэ. Манна кыттааччылар уопсастыбаны, быраабы, экэниэмикэни, айылҕаны, тиэхиньикэни, култуураны, ускуустубаны төһө билэллэрин бэрэбиэркэлиэхтэрэ. Итиэннэ бу түһүмэххэ бэйэни билиһиннэрэр хабааннаах 30-90 сөкүүндэлээх видео-презентация ирдэнэр.

Иккис түһүмэх кэнниттэн 300 бастыҥ кыттааччы салгыы күрэхтэһэр кыахтаныаҕа. Салгыы финалга уон кыттааччыттан турар хамаанданы кыайыылааҕынан быһаарыахтара. Кинилэр Ил Дархан гранын ылан, дойду бастыҥ үрдүк үөрэҕин кыһаларыгар үөрэнэр быраабы ылыахтара. Итиэннэ кыайыылаахтар өрөспүүбүлүкэ каадырдарын резервэтигэр киириэхтэрэ. Бу дьон аатын кэлэр сыл балаҕан ыйын 27 күнүгэр билиэхпит.

Тэрээһиҥҥэ миниистири кытта Менеджмент үрдүкү оскуолатын киинин салайааччы Александра Турантаева уонна «Миниистир» оонньуу былырыыҥҥы кыайыылааҕа, Нам улууһунааҕы киин балыыһа сүрүн бырааһа Ариан Сергеев кытыннылар. Кинилэр суруналыыстар уонна кэмпириэнсийэ кыттыылаахтарын интэриэһиргиир ыйытыыларыгар хоруйдаатылар.

«Саха сирин талааннара» куонкуруска кыттыан баҕалаахтар сайаапканы бу ссылканан ыытыҥ:   https://komanda.sakha.gov.ru/ru-RU/ya-talant

СӨ Ил Дарханын уонна бырабыыталыстыбатын пресс-сулууспата.

Денис Попов хаартыскаҕа түһэриилэрэ.