Константин Степанов «Наука диэйэтэлэ» номинация кыттыылааҕа

Ааптар: Николай Попов

30.06.2018

Бөлөххө киир:

Бу күннэргэ «Саха сирин киэн туттуута» норуот бириэмийэтигэр «Наука диэйэтэлэ» диэн тохсус номинацияҕа сайаапкалары хомуйуу салҕанар.

Ким сэҥээрэр, сэргиир gordost-yakutii@mail.ru электроннай аадырыска бэйэҕит сайаапкаларгытын ыытыҥ.

Бу номинацияҕа куоластааһыҥҥа киирбит сайаапкалары салгыы билиһиннэрэбит.

Константин Степанов тыа хаһаайыстыбатын наукатын доктора, «Таба» ааксыйалаах хампаанньаҕа уонна медицина кыһалҕаларын үөрэтэр наука киинигэр үлэлиир.

Төрөөбүт сирэ: Бүлүү улууһун Күүлэт нэһилиэгэ

Наукаҕа үлэтин тиэмэтэ: Аныгы национальнай бородууктанан хотугу норуоттар организмнарыгар сөп түбэһэр аһылыгы оҥоруу.

Константин Степанов 27 саҥа аһылык бородууксуйатын, икки БАД, «Табапан» таба муоһунан косметика уонна гигиена 16 араас бородууксуйатын арыйбыта.

Айбыт бородууксуйалара «Всероссийская ярмарка, знак качества ХХI века», «Росбиотех» быыстапкалар дипломнарынан уонна көмүс мэтээллэринэн наҕараадаламмыттар. 4 бородууксуйата «Арассыыйа 100 бастыҥ табаара» куонкурус лауреатынан ааттаммыттара.

Константин 182 бэчээттэммит үлэлээх. Ол иһигэр, 4 монография, 12 учуобунньук, 6 брошюра, уо.д.а.

Константин Степанов «СӨ наукатын бочуоттаах үлэһитэ», «СӨ наукатыгар ситиһиитин иһин» бэлиэ хаһаайына, «СӨ тыатын хаһаайыстыбатын туйгуна», «СӨ доруобуйатын харыстабылын туйгуна».

«Саха сирин киэҥ туттуута» бырайыак чэрчитинэн ыытыллар, «наука диэйэтээлэ» номинацияҕа куоластааһын от ыйын 9 күнүттэн саҕаланыаҕа.

Николай ПОПОВ, «Саха сирэ» хаһыат, edersaas.ru