Бүгүн, Саха өрөспүүбүлүкэтин Судаарыстыбаннаһын күнүгэр, Дьокуускайга Кырдьаҕас куоракка, Степан Аржаков пааматынньыга туруорулунна.
Долгутуулаах тэрээһиҥҥэ Ил Түмэн бэрэссэдээтэлэ Петр Гоголев, Ил Дархан уонна бырабыыталыстыба дьаһалтатын салайааччы Афанасий Владимиров, Ил Түмэн Тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин, Бүлүү улууһун баһылыга Сергей Винокуров, сири-уоту сайыннарыы боппуруостарыгар Дьокуускай куорат баһылыгын солбуйааччы Евгений Григорьев, Степан Аржаков сиэнэ Юлия Усик, хос сиэнэ Владимир Усик уонна да атыттар кытыннылар.
Тэрээһин аһыллыытыгар Петр Гоголев: “Степан Аржаков Өктөөп өрөбөлүүссүйэтин сылыгар 19 саастаах эдэркээн киһи этэ. Кини автономнай Саха сирин төрүттэспит дьонтон биирдэстэринэн буолар. Олус эдэр саастаах ыччаттар ылыммыт сүдү дьыалаларын олоххо киллэрэллэригэр, кинилэр ийэ дойдуга хайдахтаах бэриниилээхтэрэ, эппит тылларын экчи толорон тэйэллэрэ көмөлөспүтэ”, — диэн бэлиэтээтэ.
Степан Максимович Аржаков (10. 11.1899 — 17.05.1942) Саха Сиригэр Сэбиэскэй былааһы олохтоспут дьонтон биирдэстэрэ, Саха Сирин Совнаркомун бэрэссэдээтэлэ.
Аржаков С. М. 1939 сымыйанан буруйданан репрессияҕа түбэспитэ. 1956 сыл кулун тутар 31 күнүгэр Саха АССР Үрдүкү суутун Президиумун быһаарыытынан буруйа суоҕа дакаастаммыта.
Егор КАРПОВ, «Саха сирэ» хаһыат, edersaas.ru