Степан Аржаков аатынан Судаарыстыбаннай бириэмийэҕэ докумуоннары тутуу саҕаланна
Тыа хаһаайыстыбатын министиэристибэтэ Степан Максимович Аржаков аатынан Судаарыстыбаннай бириэмийэҕэ тыа хаһаайыстыбатын салаатыгар идэтийэн таһаарыылаахтык үлэлии сылдьар тэрилтэлэртэн хандьыдааттары көрдүүрүн туһунан биллэриини таһаарда.
edersaas.ru
С.М.Аржаков аатынан Судаарыстыбаннай бириэмийэ балаһыанньатын быһыытынан, хандьыдааттары улуустар, үлэ кэллэктииптэрэ эбэтэр уопсастыбаннай тэрилтэлэр киллэриллэрэ көҥүллэнэр. Хамыыһыйа хандьыдааттан ордук чорботон өрөспүүбүлүкэҕэ тыа хаһаайыстыбатын сайдыытыгар киллэрбит кылаатын, үлэһит идэтигэр маастарыстыбатын, ситиһиилэрин, көрдөрүүлэрин түмүктэрин көрөр.
Докумуоннары туттарыы атырдьах ыйын 14 күнүттэн балаҕан ыйын 14 күнүгэр диэри, Тыа хаһаайыстыбатын министиэристибэтигэр (Дьокуускай к., Курашов уул. 28, 301 кэб., төл: (4112)506663, 506691, электроннай буоста: minselhoz@ sakha. gov.ru) үлэ күннэригэр ыытыллар. Докумуоннар иккилии экземплярынан толоруллаллар, биллэриллибит болдьохтон хойутаабыт биитэр алҕастаах толоруллубут докумуону хамыыһыйа төннөрөр.
Тыа хаһаайыстыбатын салаатыгар өр сылларга илиилэрин араарбакка, таһаарыылаахтык үлэлии сылдьар, өрөспүүбүлүкэҕэ холобурга сылдьар, үрдүк көрдөрүүлээх үлэһит дьоннор аҕыйаҕа суохтар. Оннук хоһуун үлэһиттэри өйөөҥҥүт, судаарыстыбаннай-политическай деятель С.М.Аржаков аатынан Судаарыстыбаннай бириэмийэҕэ хандьыдаатынан түһэриҥ диэн Тыа хаһаайыстыбатын министиэристибэтэ ыҥырар.
Раиса Сибирякова, «Саха сирэ» edersaas.ru