Алтынньы 4 күнүгэр Дьокуускайга Сэргэлээх шоссетын 5-с км Range Rover тимир көлөлөөх дьахтар уруулун кыайан салайбакка, уот тирэҕэр тиийэн сааллыбыт. Тирэх тостон массыына үрдүгэр түспүт.
Быыһыыр сулууспа пресс-киинэ иһитиннэрэринэн, ити кэмҥэ Саха сиринээҕи быыһыыр сулууспа үлэһитэ Валерий Андросов баар эбит. Кини бэрт түргэнник көмөҕө кэлэн, тимир көлөттөн уматык тохторун-тохтубатын уонна суоппар дьахтар эчэйиини ылбытын-ылбатаҕын быһаарбыт уонна быыһыыр сулууспаны көмөҕө ыҥырбыт. Итини тэҥэ, массыыналар ааһалларыгар мэһэйдээбэтин диэн быстыбыт уот боруобатын 40 мүн кэриҥэ өрө көтөҕөн турбут.
Санатар буоллахха, Валерий Андросов уоппускаҕа сылдьыбыт эбит. Анал идэлээх быыһааччы уоппускатыгар да сылдьан быыһааччы буоллаҕа.
«Саха сирэ» хаһыат, edersaas.ru