Статистика чахчыта сүөһү, сылгы, таба уонна көтөр ахсаана эбиллэрин көрдөрдө
Өрөспүүбүлүкэтээҕи Статистика сулууспата быйылгы сыл үс ыйдаах көрдөрүүтүнэн тыа хаһаайыстыбатыгар бастакы кыбаартал түмүгүн таһаарда.
Муус устар 1 күнүнээҕи чахчынан, өрөспүүбүлүкэ үрдүнэн бас билии көрүҥүттэн тутулуга суох 207 082 ынах сүөһү, ол иһигэр 71 968 ыанар ынах, 182 823 сылгы, 141 142 таба, 24 313 сибиинньэ итиэннэ 844 923 көтөр баар эбит. Бас билии киэбинэн ыллахха, ынах сүөһү 55,1 %-а, сылгы 38,9 %-а, таба 1,8 %-а, көтөр 5,1 %-а нэһилиэнньэ кэтэх баайа буолар. Былырыыҥҥы 2019 сыл туһааннаах кэмигэр 202 808 ынах сүөһү, ол иһигэр 71 243 ыанар ынах, 178 228 сылгы, 123 553 таба, 24 616 сибиинньэ итиэннэ 821 138 көтөр баарын кытары тэҥнээтэххэ, ынах сүөһү, сылгы, таба уонна көтөр ахсаана эбиллибит. Ити иһигэр тэрээһиннээх хаһаайыстыбаларга (ХЭУо-ларга, кэпэрэтииптэргэ, бааһынай хаһаайыстыбаларга уо.д.а.) ынах сүөһү ахсаана 2,8 %-ынан, таба ахсаана 6,3 %-ынан, көтөр ахсаана 47,8 %-ынан эбиллибит.
Тохсунньу 1 күнүттэн муус устар 1 күнүгэр диэри өрөспүүбүлүкэҕэ тыыннаах ыйааһынан 1,7 тыһ. туонна сүөһү уонна көтөр этэ оҥоһуллубут, 13,7 тыһ. туонна үүт ыаммыт, 31,3 мөл. устуука сымыыт ылыллыбыт. Судаарыстыба көрөр көмөтүгэр тирэҕирэн итиэннэ тыа сирин үлэһиттэрин үтүө суобастаах үлэлэрин түмүгэр, олохтоох оҥорон таһаарыы көрдөрүүтэ сыллата бигэтик тупсарыллара үөрдэр.
Раиса Сибирякова, «Саха сирэ» хаһыат, edersaas.ru