Стас Свинобоев көҥүл тустууга Арассыыйа икки төгүллээх чөмпүйүөнэ буолла

Ааптар: 
Бөлөххө киир:

Бу күннэргэ Дагестан Каспийск куоратыгар Арассыыйа Дьоруойа Нурмагомед Гаджимагомедов кэриэһигэр 21 саастарыгар диэри уолаттарга көҥүл тустууга Арассыыйаҕа бастыыр иһин күрэхтэһии буолла. Саха сириттэн 57 киилэҕэ Лев Павлов үрүҥ көмүс уонна 70 киилэҕэ Стас Свинобоев кыһыл көмүс мэтээли ылары ситистилэр.

Саха сирин быйылгы чөмпүйүөнэ Сунтаартан сылдьар 18 саастаах Лев Павлов финалга тахсыан иннинэ биэстэ туһунна, онтон биир даҕаны техническэй баалы утарсааччыларыгар биэрбэтэ. Ол курдук, бастакы эргииргэ Санкт-Петербургтан Ахмед Хучиевы 1:1 ахсааҥҥа, иккис эргииргэ Московскай уобаластан Шамседин Шабаевы 12:1 ахсааҥҥа кыайбыта. Финал чиэппэринээҕи тустууга Лев Павлов Краснодар тустуугун Самвел Терзяны 2:0 ахсаанынан, салгыы кабардинец Абдул Калибатовы эмиэ эрэллээхтик баһыйа туппута. Финал аҥаарынааҕы киирсиигэ дагестанец Имран Хувкероовы 4:1 ахсааҥҥа кыайбыта. Салгыы Лев финалга тахсан Владикавказтан сылдьар Артем Гобаевы кыттан тустан, үрүҥ көмүс мэтээли ылла.

Арассыыйаҕа бастыыр иһин күрэхтэһии былырыыҥҥы кыайыылааҕа Станислав Свинобоев титулун быйыл көмүскээтэ. Кини бастакы эргииргэ Москваттан Глеб Гоначаровы 12:2 ахсааҥҥа, Краснодартан Кирилл Баитовы 10:0 ахсааҥҥа, Кемеровоттан Ростислав Королевы 14:4 ахсааҥҥа, Санкт-Петербургтан Ахмед Жилетежевы 6:3 ахсааҥҥа уонна Осетияттан Заур Зигоевы 10:0 ахсааҥҥа кыайбыта. Финалга Стас Хотугу Осетия-Алания бөҕөһүн Заурбек Бугуловы кытта киирсэн, 14:4 ахсааҥҥа кыайда.

Уолаттары чиэстээхтик тустубуттарынан Саха сирин Ил Дархана Айсен Николаев «Телеграмҥа» эҕэрдэлээтэ, ситиһиилэри баҕарда.

+1
0
+1
0
+1
0
+1
0
+1
0
+1
0
+1
0