Саха сиригэр ыытыллыбыт Арассыыйатааҕы таһымнаах «Оpen innovathion startup tour» аһаҕас инновациялар бырайыактарын көмүскээбит кыттааччылар стартап-туур биир чаҕылхай өрүтүнэн “Якутия” технопарк тэрээһини уратытык бэлэмнээн ыыппытын бэлиэтээтилэр.
Елена ПОТОЦКАЯ, «Саха сирэ» хаһыат, https://edersaas.ru
Ол курдук, бу тэрээһиҥҥэ кыттыбыт дьон икки күнү быһа Москва “Сколковатын” бизнес-тренердэрин кытта сылаас чэй, кофе иһэ-иһэ, минньигэс талбыт аһын аһыы-аһыы, быһата, бэйэтин дьиэтигэр сылдьар курдук усулуобуйаҕа сырытта.
Икки күнү быһа вай-фай үлэлээн, бырайыактарын көмүскүүр дьон интэриниэттэн арахсыбакка сырыттылар. Аны хас да тус-туспа үлэлиир хостору уонна көрүдүөргэ сынньана түһэр пуфиктары бэлэмнээбиттэр. Онон киһи сылаарҕаабакка эрэ, киирэ-тахса лиэксийэ истэр, чэйдээн ааһар, интэриниэккэ сонуннары көрөн ылар, наадалаах дьонун кытта ирэ-хоро кэпсэтэр. Ол быыһыгар үс хайысханан үлэлээбит бырыйыактары көрүүгэ киирэн кыттар.
Онон бу маннык тэрээһиннээх стартап-туурдары “Якутия” Технопаарка салалтата сотору-сотору тэрийэн ыытара буоллар, талааннаах, толкуйдаах ыччаттар олох бары эйгэтигэр кэскиллээх бырайыактары оҥорон, Сахабыт сирин сайдарыгар дьоһуннаах кылааттарын киллэриэ эбиттэр.
Елена ПОТОЦКАЯ, «Саха сирэ» хаһыат, https://edersaas.ru