Ил Дархан Айсен Николаев Доруобуйа харыстабылын туһунан ыйааҕар 1-кы №-дээх Мэдиссиинэ национальнай киинин генеральнай дириэктэрэ Станислав Николаевич Жирков санаатын үллэһиннэ:
— Бу ыйаах тахсан Саха сирин олохтоохторун доруобуйаларыгар болҕомтону ууралларыгар уонна инникилэрин торумнуулларыгар сүрүн сорук буолла. Мин санаабар, бу өрөспүүбүлүкэ сайдыытыгар улахан оруоллаах. Доруобуйа, чэгиэн буолуу – киһиэхэ саамай күндү, кини туохха да тэҥнэммэт. Бу ыйаах дьон доруобуйатын бөҕөргөтөрүгэр, тупсарынарыгар, бэйэтин көрүнэригэр аналлаах. Хас биирдии киһи доруобуйатын тупсарыыга улахан болҕомтотун ууруохтаах. Чахчы чөл, чэгиэн эрэ норуот сайдар кыахтаах уонна сырдык инникилээх дии саныыбын.
Бу өрөспүүбүлүкэ доруобуйа харыстабылын эйгэтигэр туһуламмыт ыйааҕынан биһиги Мэдиссиинэбит киинигэр улахан уларыйыы буолуоҕа, ол курдук инженернэй-тиэхиньиичэскэй уларыйыылар баар буолуохтара. Онуоха үлэ ыытыллан, өрөспүүбүлүкэ доруобуйатын харыстабылын сүрүн сирдьитэ буолуоҕа. Биомэдиссиинискэй клеточнай технология уонна генетика сайдыытын өттүгэр 2022 сылтан Национальнай биобанк үлэлээн саҕалыаҕа. Ол биобанк үлэтинэн сибээстээн мэдиссиинискэй генетика сайдыыта саҕаланыаҕа. Ону сэргэ, бу ыйаах чэрчитинэн тулалыыр эйгэбитин, айылҕабытын харыстыыр соруктар эмиэ турдулар. Оттон айылҕа биһиги чэгиэн буолуубутун кытта быһаччы ситимнээх. Биһиги инникибит профилактическэй мэдиссиинэттэн улахан тутулуктааҕын бэлиэтиэм этэ.
Ульяна ЗАХАРОВА, edersaas.ru