Станислав Цюхцинскай: «Абый улууһугар интириниэт хаачыстыбатын тупсара сатыахтаахпыт»
Олунньу 18 күнүгэр Абый улууһугар СӨ ситэриилээх былааһын 2021 сыллааҕы отчуотун иһитиннэрдэ. Бырабыыталыстыба отчуотун быһа холоон 50-тан тахса Абый олохтооҕо иһиттэ. Икки чаастан ордук ыытыллыбыт дакылааттаах мунньах кэнниттэн, улуус аҕа баһылыгын кытта Станислав Янович Цюхцинскайдыын кэпсэтэн, отчуот хайдах ааспытын туһунан ыйыталастым:
— Иккис сыл бырабыыталыстыба отчуотун интэриниэт көмөтүнэн, быһа холбонуунан иһиттибит. Кэнники интэриниэт сабыдыала олус күүһүрдэ, үлэҕэ даҕаны, үөрэххэ даҕаны эрэллээх холбонуута суох олох тэтимин батыһар уустугурда. Онон Абый нэһилиэнньэтэ биир сүрүн туруорсуута интэриниэт хаачыстыбатын тупсарыыга сытар. Биллэн турар, биһигиттэн киин сытар улуустарга оптоволокно аныгыскы сылга тардыллара былааннанар, онон биһиги ол туһунан чугас кэмҥэ саҥарбаппыт даҕаны. Ол эрээри, улуус иһинэн ВОЛС тардан, нэһилиэктэри холбоон интэриниэти туһаныыны бэрээдэктээбит киһи, спутнигы туһаныыны 20-25% тупсарыахпыт этэ диэн санаалаахпыт.
Сүрүннээн бырабыыталыстыба отчуотун дьон астына иһиттэ, өрөспүүбүлүкэ ситиһиилэрэ, сайдыы диэки хаамыылара санааны көтөҕөр. Тырааныспар уматыгар, сөмөлүөтүнэн айан төлөбүрүгэр Арктика оройуоннарыгар субсидия көрүллүбүтэ үөрдэр. Отчуот кэмигэр урбааҥҥа, доруобуйа харыстабылыгар, социальнай бэлиитикэҕэ, быйыл буолбут иэдээннээх баһаар урусхалын туоратыыга сыһыаннаах кыһалҕалары ырыттыбыт. Баһаарынай пууннары хааччыйыы туһунан кэпсэттибит, ыраах сытар нэһилиэктэри вездеходунан хааччыйыы туһунан, уонна да атын кыһалҕалары таарыйдыбыт. Элбэх этии бороткуолга киирдэ, толорулларынут кэтиэхпит.