Бу күннэргэ, атырдьах ыйын 16-18 күннэригэр, Башкортостан өрөспүүбүлүкэтин киинигэр Уфаҕа көҥүл тустууга юниордарга (21-гэр диэри саастаахтарга) аан дойду үрдүнэн бастыыр иһин күрэхтэһии буола турар.
Манна 70 киилэҕэ диэри ыйааһыҥҥа Арассыыйа сүүмэрдэммит хамаандатыгар биир дойдулаахпыт Станислав Свинобоев киирэн туста сылдьар. Бүгүн кини бастакы киирсиитин (финал 1/8)— Турция бөҕөһүн Оздемиры 6:4 ахсааҥҥа, салгыы Индия тустуугун Джайдип Джайдибы (финал 1/4) 6:2 ахсааҥҥа кыайталаата.
Онон финал аҥаарынааҕы киирсиигэ Станислав Азербайджантан сылдьар Европа 2021 сыллааҕы чөмпүйүөнүн Джабраил Гаджиевы кытта тустуоҕа.
Финалга тахсар иһин киирсии Саха сирин бириэмэтинэн 22:00 чааска буолуоҕа.
+1
+1
+1
+1
+1
+1
+1