Хомсомуол 100 сыллаах үбүлүөйүн бэркэ долгуйан кэтэһэн, дойдубар Мэҥэҕэ тахсан астыктык бэлиэтээбитим туһунан кылгастык кэпсиэхпин баҕардым.
Дьонум ыытыахтарын олох баҕарбаттар, өрүскэ кутталламмыт, кыдьымах бу киириэ, ити киириэ дииллэр. Мин, хорсун-хоодуот хомсомуолка, онтон тохтуом дуо – син биир бардым. “Ирбискэ” киирбиппэр – миигиннээҕэр быдан эдэр дьон олороллор. Бу дьону көрөөт: “Хомсомуол 100 сылынан, хомсомуоллуу баран иһэҕит дуо?” – диибин. Оруобуна кинилэр эбит! Дьоммун анараа биэрэккэ массыына күүтэрин биллим, миигин ылыах буоллулар. Этэҥҥэ кытылбытын буламмыт, бэлэм массыынаҕа “дьоп» гына түстүбүт. Ыллаан-туойан, кэпсэтэн-ипсэтэн Майаҕа тиийэ оҕустубут.
Күнүс 2 чаастан урукку райкомол дьиэтигэр “Көлүөнэлэр көрсүһүүлэригэр” сырыттым. Тула өттүбүт барыта – кытыастар кыһыл өҥ! Былакааттар, знамялар, араас атрибуттар. Көрсүһүү күлүм түгэннэрэ, хаартыскаҕа түһүү, үөрүү-көтүү балысхан! Хайдах эрэ ол кэмҥэ – ССРС-ка сылдьар курдук буолан ыллыбыт. Биллэн турар, баттах маҥхайбыт, сүһүөх кырдьыбыт. Ол эрээри харах уота чаҕылыйбыт, сүрэх тэбэрэ эдэрсийбит! “Эдэр ыччат түөстэрин түллэҥнэтэр гимнэри” тэҥҥэ ыллаһа олордубут. Табаҕа оскуолатын үөрэнээччилэрэ Хомсомуол 100 сылыгар анаан бэртээхэй театрализованнай дьүһүйүүнү көрдөрдүлэр, хомсомуол бэйээтэ Эллэй “Буурҕа-буулдьа дьылыгар” поэматынан.
Онтон Д.Ходулов аатынан норуодунай тыйаатыр саалатыгар Хомсомуол 100 сылыгар аналлаах өрөгөй чаас буолла. Эҕэрдэ тыл бастыҥа, хомсомуолга көхтөөхтүк үлэлээбит дьоҥҥо наҕараадалары туттарыы, агитбиригээдэлэри көрүү уо.д.а. сонунтан сонун көрдөрүүлэр буолан истилэр. Бу былаһын тухары экраҥҥа Мэҥэ Хаҥаластааҕы хомсомуол тэрилтэтин үлэтэ-хамнаһа, кини ситиспит үрдүк кирбиилэрэ тыктарыллан көрдөрүллэ турда.
Хомсомуол маассабай ырыаларын саала тэҥҥэ ыллаһа олордо. Маны көрө-истэ, ыллаһа олорон саныыгын: “Дьэ, кырдьык , Хомсомуол диэн чахчы даҕаны ыччаты түмэр, сомоҕолуур сүдү күүс эбит!”
Мин эрэ итинник санаабатаҕым буолуо, бу өрөгөйдөөх үбүлүөй хас биирдии кыттыылааҕа эдэр сааһын эргиппит, харахтыын сырдаабыт, уҥуохтуун үрдээбит буолуохтаах!
Үбүлүөй салгыыта “Дьол түһүлгэтигэр” сандалы тула ыытылынна. Манна махтал тылы этиэҕи баҕарыллар бу киэҥ уораҕай хаһаайкатыгар Лидия Павловаҕа уонна кини хомсомуол доҕотторугар. Наһаа үчүгэйдик тэрийбиттэр, барыта тып-тап курдук. Манна буолла истиҥ-иһирэх кэпсэтии, ырыа-тойук, эдэр саас, хомсомуол сылларын ахтыы, үҥкүү-битии!
Түмүкпэр этиэм этэ: аныгы ыччат урукку хомсомуоллартан элбэххэ үөрэниэн сөп. Куруук мэлдьи инники күөҥҥэ сылдьарга, Ийэ дойдуну итиитик таптыырга, дьиҥнээх патриот буоларга, үлэҕэ-хамнаска эппиэтинэстээх буоларга.
Елена Прокопьева, хомсомуол урукку үлэһитэ.