СӨ Ил Дархана Айсен Николаев иһитиннэрбитинэн, муус устар 28 күнүнээҕи туругунан, Саха сиригэр суукка иһигэр 7 киһи ыалдьыбыт. Итинтэн 6 киһи — Дьокуускай куоракка, 1 — Хаҥалас улууһугар.
edersaas.ru
Хаҥалас улууһугар ыалдьыбыт киһи балыыһа үлэһитэ буоларын эттэ. Оттон Дьокуускай куоракка ыалдьыбыт дьон бары эрдэ ыарыһаҕы кытта хантаактаспыттар эбит.
«Бастатан туран, Дьокуускай куоракка өссө элбэх киһи ыалдьар кутталлааҕынан сибээстээн, өрөспүүбүлүкэ кылаабынай санитарнай бырааһын этиитинэн, мааскалаах сылдьыы эрэсиимин киллэрдибит. Дьокуускайы сэргэ, мааскалаах сылдьыы эрэсиимэ Мииринэйгэ, Нерюнгрига, Ленскэйгэ, Алдаҥҥа, Аллараа Бэстээххэ, Тиксиигэ уопсастыбаннай тырааныспарка, уопсастыбаннай миэстэҕэ, маҕаһыыннарга сылдьарга булгуччу ирдэнэр. Хомойуох иһин, атыы тэрилтэлэрин үлэһиттэрэ бэйэлэрэ мааската суох сылдьалларын туһунан үгүстүк үҥсэллэр, хонтуруоллуур уорганнар бэлиэтииллэр. Маны бэрээдэктиир ирдэнэр», — диэтэ.
Чайыҥдаҕа үлэлиир 10500 киһиэхэ барытыгар коронавируска тестированиены оҥорбуттар. Түмүк билиҥҥитэ биллэ илик. Быстах кэлэр түмүктэртэн биллэринэн, ыалдьыбыт киһи ахсаана элбэх диэтэ. «Биһиги туруорсуубутунан, Газпром саҥа быһаарыыны ылынара ирдэнэр. Тоҕо диэтэххэ, ыарыһаҕы, доруобай дьону араартааһын бүтэ илик буолан, үлэлэрин бүтэрбит дьон онно миэстэтигэр кэтэһэн олороллор», — диэн эттэ. Ыалдьыбыт дьон Ямало-Ненецкэй уокуругу сэргэ 50-тан тахса киһи Саха сиригэр (Ленскэй, Дьокуускай) эмтэнэрин иһитиннэрдэ. Сорохтор туруктара ыарахан диэн этэр.
Дьокуускай куоракка 3 ыарахан туруктаах киһи баар эбит. Медиктэрбит бу дьон доруобуйаларын туһугар туох кыалларынан көмөлөһөллөр диэтэ.
Людмила ПОПОВА, edersaas.ru