Кэлиҥҥи сууккаҕа өссө 205 киһи хамсык дьаҥар сыстыбытын туһунан СӨ Доруобуйаҕа харыстабылын миниистирэ Елена Борисова брифинг кэмигэр иһитиннэрдэ.
Ол курдук, Дьокуускай куоракка – 96, Нерюнгрига – 14, Алдаҥҥа – 12, Мэҥэ Хаҥаласка – 11, Миринэйгэ – 9, Горнайга, Тааттаҕа – аҕыстыы, Аммаҕа – 7, ону таһынан, өссө 14 улууска бииртэн биэскэ диэри түгэн бэлиэтэммит. Суукка устата 3264 анаалыһы оҥорбуттар.
“Бүгүн номнуо Саҥа дьыллааҕы бырааһынньыктарга бэлэмнэнэбит. Ол эбэтэр, харыстанар сириэстибэлэри, эми-тому саппаас бэлэмниибит.
Атырдьах ыйыттан таһыттан сылдьан эмтэнэр дьону эминэн хааччыйыыны олоххо киллэрии саҕаламмыта. Күн бүгүн 126 мөлүйүөн солкуобай үп эмп ыларга туһанылынна. Итинтэн 36,5 мөлүйүөн солкуобай дойду хааһынатыттан көрүллэр үп. 11 тыһыынчаттан тахса киһи эми ылла. Номнуо ыалдьан бүппүт дьоҥҥо эминэн эбэтэр харчынан толуйуу оҥоһуллар дуо, диэн ыйытааччы элбэх. Эмп ыалдьа сылдьар дьоҥҥо эрэ бэриллэр” – диэн эттэ.
Хамсыгынан сибээстээн тутуһуллар миэрэлэр, кирииби утары быһыы, ааспыт сыллардаахха тэҥнээтэххэ, ОРВИнан уонна кириибинэн ыалдьыыны намтаппытын, ордук оҕолор ортолоругар боруогу куоһара илигин бэлиэтээтэ. Баччаларга ОРВИнан, кириибинэн харантыыннар саҕаланан барааччылар диэн санатта.
“Саха сирэ” хаһыат, edersaas.ru