Бэрэсидьиэннэр Владимир Путин уонна Тайип Реджеп Эрдоган «Спутник V” быһыыны Турцияҕа таһаарар уонна туризмы көҥүллүүр туһунан төлөпүөнүнэн кэпсэттилэр.
Быһыыны ыам ыйыттан тиэйэн саҕалыыр былааннаахтар. Ону тэҥэ, “Спутнигы” Турцияҕа бэйэтигэр оҥорон баран, тарҕатыахтара. Эпидемияны утары миэрэлэр ылылланнар, балаһыанньа тупсан, сотору кэминэн Арассыыйа олохтоохторо Турцияҕа сынньана бараллара көҥүллэнэригэр бэрэсидьиэннэр эрэллэрин биллэрдилэр.
Турцияҕа муус устар 29 күнүттэн ыам ыйын 17 күнүгэр диэри кытаанах локдаун (хартыына) биллэриллэн турар. Туох баар тэрилтэлэр сабыллан тураллар, куораттарга кэлэргэ-барарга анал көҥүллэтии ирдэнэр, уопсастыбаннай тырааныспары аҥаарын эрэ толорор көҥүллэнэр.
Коронавируснай инфекциянан ыалдьыы элбээн, муус устар 15 күнүттэн бэс ыйын 1 күнүгэр диэри Арассыыйаттан көтүү хааччахтанан турар. Турция посола Мехмет Самсар туризм эйгэтигэр үлэлиир дьоҥҥо барыларыгар быһыы бэриллиэҕэ диэн эрэннэрбитэ.
Ангелина Васильева, “Саха сирэ” хаһыат, edersaas.ru
Хаартыска: tourdom.ru