Сомоҕолоһуу сылыгар Уус Алдан улууһун I Хоро нэһилиэгэр спорт саалата үлэҕэ киирдэ. Бу спорт саалата «Мин Сахам сирэ — 21-с үйэҕэ» бырагыраама чэрчитинэн тутулунна. Саҥа эбийиэк толору хааччыллыылаах, таҥас уларыттар, суунар, үлэһиттэргэ анаан туспа хостордоох.
Спорт саалата арыллар үөрүүлээх тэрээһинигэр нэһилиэк олохтоохторун улуус дьаһалтата, спортивнай федерациялар, уопсастыбаннай тэриллиилэр бэрэстэбиитэллэрэ эҕэрдэлээтилэр, араас спортивнай тэриллэри ыларга сертификаттары туттардылар.
«Улууспутугар бэлиэ күн үүммүтүнэн эҕэрдэлиибин. Спорт саалатын тутуу үлэтэ барыбытын түмтэ. Эбийиэк Сомоҕолоһуу сылыгар үлэҕэ киирбитэ оруннаах. Нэһилиэнньэ уонна дьаһалта биир сыаллаах, бэйэ-бэйэлэрин өйөһөр буоллахтарына үлэ үтүө түмүктээх буолар. Маннык үлэлээн, 2022 сыллаахха улууспутугар ыытыллыахтаах Саха сирин норуоттарын спортивнай оонньууларын дьоһуннаахтык тэрийэн ыытыахпыт», — диэн улуус баһылыга Алексей Федотов бэлиэтээн эттэ.
Чараҥ сэлиэнньэтэ Бороҕонтон чугас турар, онон бу саала норуоттар оонньууларыгар эмиэ кыттыгастаах буолуоҕа, тэрээһиннэр ыытыллыахтара.
Манна даҕатан суруйдахха, Чараҥ спортсменнардаах сэлиэнньэнэн аатырар. Ол курдук, гиирэҕэ аан дойду чөмпүйэнээтин призера Алексей Аммосов, мас тардыһыыга Саха сирин муҥутуур чөмпүйүөнэ Айсен Атастыров, Европа чөмпүйэнээтин призера Артур Орлов, «Азия оҕолоро» оонньуу призера Анжела Черноградская, Арассыыйа устудьуоннарын «Золотая лига» диэн мини-футболга чөмпүйэнээтин призера Айтал Бурцев уо.д.а. мантан төрүттээхтэр.
Дьулустаан Сергеев,
Уус Алдан дьаһалтатын пресс-сулууспата.