Владивостокка 18-гар диэри саастаах уолаттарга Уһук Илин федеральнай уокуругар греко-римскэй тустууга бастыыр иһин күрэхтэһии түмүктэннэ. Күрэхтэһиигэ Саха сириттэн, Магадантан, Хабаровскайтан, Сахалинтан, Приморье уонна Забайкалье кыраайдарыттан, Чукотка национальнай уокуругуттан барыта 80 эдэр тустуук кытынна.
Саха сирин тоҕус кыттааччылаах хамаандатын өрөспүүблүкэ ыстаарсай тириэньэрэ Матвей Матвеев салайан илдьэ сырытта. Арассыыйаҕа кыттарга путевкалаах күрэхтэһиигэ уолаттарбыт ситиһиилээхтик туһуннулар. 55 киилэлээхтэргэ тустубут Намтан сылдьар Артур Пинигин сэттэ утарсааччытын кэннигэр хаалларан, түмүккэ Хабаровскайтан сылдьар спорт маастарыгар кандитат Игорь Садырины кыайан бастаата. Иккис кыһыл көмүс мэтээли хамаандаҕа 110 кг диэри ыйааһыннаахтарга Үөһээ Дьааҥы Сайдыы бөһүөлэгиттэн сылдьар Андрей Слепцов аҕалла. Ыарахан ыйааһыннаах тустуукпут финалга эмиэ маастарга кандитат уолу Семен Кислицыны (Хабаровскай) 6-0 ахсаанынан сабырыйда. Бу күрэхтэһиигэ Андрей түөртэ тустаары утарсааччыларыттан 36 баалы ылла, 2-ни эрэ биэрдэ. 11 кыттааччылаах 51 киилэҕэ түмүккэ тахсан хотторбут Эбээн Бытантайтан сылдьар Семен Стручков иккис миэстэлэннэ. Маны тэҥэ Эдьиигэн уола Игорь Антонов уонна Уус Алдантан Георгий Винокуров бэһис миэстэлэнэн, Арассыыйа күрэхтэһэргэ биэс уолбут путевкаланнылар.
Хамаанда салайааччыта Матвей Матвеев хамаанда ситиһиилээхтик кыттарыгар күүс көмө буолбут Дмитрий Румович Ушницкайга, Олимпийскай эрэллэри бэлэмниир училище дириэктэрэ Алексей Алексеевич Филипповка, Спортивнай солбугу бэлэмниир өрөспүүбүлүкэтээҕи киин дириэктэрэ Василий Иванович Егоровка, куруук көмөнү оҥорор Андрей Слепцов эдьиийигэр Варвара Николаевна Погодаеваҕа, хамаанданы бэлэмнээбит тириэньэрдэргэ Р.И.Аджига, К.И.Павловка, Х.С.Потаповка уонна Владивостокка көмөлөспүт көҥүл тустуу тириэньэрдэригэр И.П.Пантиловка, В.В.Корякиҥҥа барҕа махталын тиэрдэр!
