Челябинскайга дзюдоҕа турниртан үчүгэй сонуннар кэллилэр. Саха сирин спортсмен кыргыттара өссө икки мэтээллэннилэр.
Бүтүн Арассыыйатааҕы күрэхтэһиигэ Саха сирин сүүмэрдэммит хамаандатын чилиэннэрэ Надежда Татарченко уонна Ольга Лихота юниордарга боруонса мэтээли ыллылар. Санатан эттэххэ, бу иннинэ кыһыл көмүс мэтээли Карина Ефимова ылбыта диэн СИА иһитиннэрэр. Надежда Татарченко 70 кг диэри ыйааһыннаахтарга күрэхтэспит. Манна эрэгийиэннэртэн 17 кыттааччы күөн көрсүбүт. Боруонса наҕараада иһин күөн көрсүһүүгэ, Свердловскай уобаластан кэлбит спортсменка Людмила Налетованы кыайбыт. Оттон 78 кг диэри ыйааһыҥҥа Ольга Лихота сэттэ утарылаһааччыны кытары күрэхтэспит.
Онон тириэньэр Дамдиндорж Гомбодорж салайааччылаах үс спортсменнаах хамаанда биир кыһыл көмүс, икки боруонса мэтээллэммит.
«Екатеринбурга төрдүс ый эрчиллии түмүгэ үчүгэй. Арай, быйыл Арассыыйа чөмпүйэнээтэ уонна кадеттарга, юниордарга Арассыыйаҕа бастыыр иһин күрэхтэһии түмүктэрэ биллэр биричиинэнэн ыытыллыбаттара сонньутар. Кэнники икки нэдиэлэҕэ буолбут бүтүн Арассыыйатааҕы икки улахан күрэхтэһиигэ биһиэхэ кыайыылаахтар уонна призердар бааллара санаабытын бөҕөргөтөр. Ити түһүлгэлэргэ сүрүн күрэстэһээччилэрбит дойду сүүмэрдиир хамаандатыгар киирэр уонна мэтээли ылар иһин кытыннылар. Олунньуга-кулун тутарга 23 саастарыгар диэри спортсменнарга Арассыыйаҕа бастыыр иһин күрэхтэһии ыытылларыгар эрэнэбин. Биһиги онно анаан сарсыҥҥыттан бэлэмнэммитинэн барабыт. Түгэнинэн туһанан, хамаанда спортсменнарын уонна тириэньэр аатыттан күрэхтэһиигэ кэлэрбитигэр өйөөбүт Ил Түмэн дьокутаатыгар Валентин Семерковка махталбытын тиэрдэбит», — диэбит Дамдиндорж Гомбодорж .
+1
+1
+1
+1
+1
+1
+1