Бу холуобунай дьыала былырыын, алтынньы ыйга, тэриллибитэ. Кимнээх эрэ хас да күн субуруччу «Спортмастер» маҕаһыынтан табаардарын уорбуттара.
Вера МАКАРОВА, «Саха сирэ» хаһыат, https://edersaas.ru/
Дьыала силиэстийэлэнэн бүтэн, суут мунньаҕар көрүллэн, бириигэбэр тахсыбытын туһунан СӨ Борокуратууратын пресс-сулууспата иһитиннэрдэ.
Сууттанааччылар буруйдарын хара маҥнайгыттан толору билиммит буоланнар, кинилэр хадатаайыстыбаларынан, дьыаланы суут ураты бэрээдэгинэн, ол эбэтэр, суут силиэстийэтэ суох, көрбүттэр.
Дьокуускай куорат федеральнай суута быһаарбытынан, 26 саастаах устудьуонка уонна 41 саастаах автослесарь 2016 сыл алтынньы 8-тан 26 күнүгэр диэри кэм иһигэр «Дэлэй» атыы-эргиэн киинигэр баар «Спортмастер» маҕаһыынтан алтата төхтүрүйэн кэлэн, спортивнай таҥастары уорбуттар. Эрдэттэн киксэн, сүбэлэһэн, былааннаан.
Кинилэри маҕаһыын атыылааччылара алтынньы 30 күнүгэр харыларыттан харбаабыттар. Уопсайа, 109 тыһ. солк. тахса суумалаах хоромньу оҥоһуллубут. Уоруллубут табаартан сороҕо былдьаммыт, сороҕун батара охсубуттар.
Суут бу уоруйахтары РФ Холуобунай кодексатын 158-с ыст. 2-с чааһын «а» пуунунан, ол эбэтэр, бөлөҕүнэн эрдэттэн киксэн уорууга буруйдааҕынан билинэн, кыыһы 2 сыл 1 ыйга көҥүлүн быһары усулуобунайынан ааҕан, 4 сылга тургутар болдьоххо уурбут, оттон эр киһини — 1 сыл 8 ыйга көҥүлүн быһары усулуобунайынан ааҕан, 3 сылга тургутар болдьоххо уурбут.
Ол эбэтэр, ити усулуобунай болдьох иһигэр атын буруйу оҥордохторуна, күлүүстээх хаайыыга утаарыллаллар.
Вера МАКАРОВА, «Саха сирэ» хаһыат,https://edersaas.ru/
Хаартыска: интернеттэн.