Аммаҕа ыытылла турар спортивнай оонньууларга волейбол күрэхтэһиитин көрөөрү көрөөччүлэр ититэр систиэмэ сабыытыграр ыттыбыттар.
Ол уйбакка сууллан, сэттэ киһи эчэйдэ. Бу туһунан спортивнай оонньуулар сүрүн судьуйалара Альберт Трофимов киэһэ ыытыллыбыт пресс-кэмпириэнсийэ кэмигэр маннык кэпсээтэ:
— Волейбол кэмигэр 09.43 чааска Амма уонна Нерюнгри хамаандалара күрэхтэһэ сырыттахтарына көрөөччүлэр ититэр систиэмэни сабан турбут оҥоһууга тахсан олорбуттарын уйбакка алдьанна. Ол түмүгэр сэттэ киһи эчэйдэ: биэс Амма хамаандатын уонна икки Дьокуускай хамаандатын оонньооччулара. Амма бэрэстэбиитэлэ иһитиннэрбитинэн, Амма хамаандатын тутаах оонньооччуларыттан биир кыыс тоноҕоһун уҥуоҕун уонна өссө биир кыыс төбөтүн эчэппит. Кыргыттар бэйэлэрэ этэллэринэн, доруобуйаларын туруктара этэҥҥэ үһү. Ол да буоллар, иккис кыыһы Дьокуускайдаппыттар. Тута бириэмэтигэр МЧС, медсулууспа кэлэн бастакы көмөнү оҥордулар. «Суһал көмө» 3-4 мүнүүтэ иһигэр кэлэн, эчэйии ылбыттары балыыһаҕа иттэ. Бу быһылаан көрөөччүлэр сэрэҕэ суохтарыттан таҕыста. Оонньууну тохтотон, инструктаж ыыппыппыт.
Айтана Аммосова, edersaas.ru