Бэс ыйын 29 күнүгэр биир да кыырпах былыта суох, ыраас халлааннаах күн үүнэн, арҕааттан сүрэҕи сайар салгынынан илгийэн,төһө да умайар уот куйаас сатыылаатар, суугунуур солко оттоох, сугуннаах Суоттубут сиригэр успуорду кэрэхсиир, успуорт чыпчаалларын дабайар, чэгиэн-чэбдик чөл туругу тарҕатар ытык-мааны дьоммут-сэргэбит, күндү ыалдьыттары көрсөөрү муһуннулар.
edersaas.ru
Саха сирин VIII спортивнай оонньууларын уота 2018 с. VII спортивнай оонньуулар ыытыллыбыт Амма улууһуттан саҕыллан, Мэҥэ Хаҥалаһынан Уус Алдан улууһун Өлтөх нэһилиэгиттэн Суоттубут сиригэр кэлэр, кэрэ-бэлиэ түгэнин үрдүк таһымнаахтык, истиҥник эҕэрдэлээн көрүстүлэр.
VIII спортивнай оонньуу күөх төлөнүн уота Уус Алдан улууһун бары нэһилиэктэригэр сылдьан, от ыйын 5 күнүгэр улууспут киинигэр Бороҕоҥҥо, «Майаҕатта Бэрт Хара» стадионыгар умайан, Саха сирин норуоттарын VIII спортивнай оонньуулара саҕаламмытын кэрэһэлиэхтээх.
VIII спортивнай оонньуулар күөх төлөнүн уотун нэһилиэкпитигэр күөрэччи тутан аҕаллылар:
СӨ физкультуратын уонна успуордун үтүөлээх үлэһитэ, СӨ үлэҕэ уонна успуортка бэтэрээнэ, экстремал сүүрүк, Верхоянскай улууһун бочуоттаах олохтооҕо Дмитрий Николаевич Горохов; 1990 сыллаахха Горнай улууһугар ыытыллыбыт «Манчаары» оонньууларын призера, чэпчэки атлетикаҕа өрөспүүбүлүкэтээҕи күрэхтэр хас да төгүллээх призердара, Уус Алдан улууһун Курбуһах нэһилиэгин орто оскуолатын физкультураҕа учуутала Владимир Иванович Тордуянов; чэпчэки атлетикаҕа спорт маастара, Саха сирин норуоттарын, «Манчаары» оонньууларын призердара, Чурапчы улууһуттан Спиридон Спиридонович Макаров; 2009 сыллаахха «Манчаары» оонньууларын кыттыылааҕа, 2001 с. Ильмень күөлү эргийэ сүүрүү кыттыылааҕа, 2009 с. Бүлүү улууһугар ыытыллыбыт спартакиада кыттыылааҕа, Сунтаар улууһуттан Геннадий Владимирович Пустоляков; Арассыыйа, СӨ үлэҕэ, успуортка бэтэрээнэ, РФ хонуктаах сүүрүүгэ успуорт маастарыгар хандьытаат, СӨ хотугу сүүрүүгэ Европа марафоннарын кыайыылааҕа, Арассыыйа хонуктаах сүүрүүгэ үрүҥ көмүс призера, 10 тыһыынча килэмиэтиргэ Арассыыйа 3 төгүллээх чөмпүйүөнэ, дьахталлар ортолоругар өрөспүүбүлүкэтээҕи күрэхтэһиилэр 3 төгүллээх чөмпүйүөннэрэ, 3-5-10 килэмиэтиргэ өрөспүүбүлүкэ хас да төгүллээх чөмпүйүөнэ Валентина Гаврильевна Доргуева; «Сулус спорт» кулууп чилиэнэ, Арассыыйа уонна өрөспүүбүлүкэтээҕи, любительскай сүүрүүлэр кыттыылаахтара, Ильмень күөлү эргийэ сүүрүү кыттыылааҕа, «Кыайыы факела» Тверь-Ржев-Вязьма-Брянск маршрутунан сүүрүү кыттыылааҕа, Мэҥэ Хаҥаластан Виктория Анатольевна Баишева; «Стаер» кулууп чилиэнэ, «Манчаары» оонньууларын кыттыылааҕа, «Кыайыы факела» Тверь-Ржев-Вязьма-Брянск маршрутунан сүүрүү кыттыылааҕа, Нам улууһуттан Яна Юрьевна Егорова.
Бары даҕаны, биллэр-көстөр спортсменнар успуорт болуоссатыгар сүүрэн кылбаһан киирэн, «ураа» хаһыыга уйдаран, ытыс тыаһыгар бигэнэн, муусукаҕа доҕуһуоллатан болуоссаты эргийэ сүүрүүлэрэ ураты, умнуллубат көстүү. Хас түһүмэх аайы Суотту бэтэрээн спортсменнара арыаллаатылар.
Сүүрүү бөлөҕүн баһылыга Дмитрий Николаевич Горохов мустубут дьоҥҥо, спартакиада уотун суолтатын, маннык сүүрэн дьону-сэргэни, эдэр ыччаты чөл олоххо угуйалларын, успуортка сыһыаралларын кэпсээтэ. Кырдьык даҕаны, харахха тута быраҕыллар, таҥастыын-саптыын ураты спортсменнар сыанаҕа кэккэлии турбуттара кими баҕарар кинилэр курдук буолуон баҕарарга ыҥырар курдук.
Нэһилиэкпит баһылыга Василий Иннокентьевич Иванов инникитин да маннык чөл олоҕу тутуһан, успуорду өрө тутан өрөгөйдүүллэригэр баҕаран туран, хас биирдиилэригэр өйдөбүнньүк бэлэх туттартаата.
Остуол тенниһигэр 1 разрядтаах спортсменка, СӨ доруобуйаҕа харыстабылын туйгуна, үтүөлээх үлэһитэ, РФ доруобуйаҕа харыстабылын уонна социальнай сайдыытын туйгуна, үлэ бэтэрээнэ, “СахаВА” бочуоттаах маастара, 2001 с. Арассыыйа бэтэрээннэргэ, чэпчэки атлетикаҕа кыайыылааҕа, Суотту, Чурапчы улууһун Бахсы нэһилиэктэрин бочуоттаах олохтооҕо, суоттулар киэҥ туттар бэтэрээн-спортсмеммыт Екатерина Павловна Саввина күөх төлөнү күөрэччи тутан туран, эдэр ыччаты, «успуорду өрө тутан, чөл олохтоноллоругар ыҥырда.»
Суоттулар биир бастыҥ, элбэҕи эрэннэрэр эдэр спортсмеммыт Ньургун Ньургунович Сокольников — Сокольниковтар спортивнай дьиэ кэргэн кыра уоллара. Национальнай ыстаныыга СӨ успуордун маастара, чэпчэки атлетикаҕа Арассыыйа успуордун маастарга хандьытаата, 2020 сылга Уус Алдан улууһун бастыҥ спорстмена, спорт национальнай көрүҥнэригэр «Өрөспүүбүлүкэ бастыҥ спортсмена» аат хаһаайына, СВФУ физкультураҕа уонна успуорка отделениетын 3 кууруһун устудьуона, эдэрдэргэ атах оонньуутугар өрөспүүбүлүкэ 8 төгүллээх рекордсмена Саха сирин VIII спортивнай оонньууларын күөх төлөнүн өрө тутан болуоссакка бочуоттаах эргиир оҥорон тэрээһини түмүктээтэ.
Бу күн Суотту бэтэрээн спортсменнара мэтээллэрин түөстэригэр иилинэн кэлбиттэрэ биир ураты, чаҕылхай көстүү буолла. Бэтэрээннэр бэйэлэрин кэмнэригэр нэһилиэктэрин, улуустарын, өрөспүүбүлүкэлэрин чиэһин үгүстүк көмүскээн, хара көлөһүннэрин тохпуттарын кинилэр түөстэрэ күлүмүрдүүрэ дакаастыыр.
Экстремал сүүрүктэргэ, айылҕа араас кубулҕатын билиммэккэ, Уус Алдан улууһун нэһилиэктэригэр этэҥҥэ сылдьан, күрэхтэһии күөх төлөнүн от ыйын 5 күнүгэр «Майаҕатта Бэрт Хара» стадиоҥҥа күлүбүрэтэ уматалларыгар суоттулар алгыы хааллылар.
Күөх төлөн уот 2 Бороҕон нэһилиэгин суолун тутан, дьону-сэргэни үрдүккэ, кэрэҕэ угуйа бара турда.
“Түөстэрэ күлүмүрдэс мэтээллэр
Күөх төлөн уотугар кыттыһаннар,
Күрэхтэһии төлөнүн сахтылар,
Кыайыыга ыҥыран угуйдулар.
Көлөһүн тохтор күрэҕэр
Ким күүстээх-ол кыайдын,
Эдэр саас эрчимнээх сүрэҕэр
Кыайыы өрөгөйө төлөннүрдүн!…
«Саха сирэ», edersaas.ru анаан Иннокентий ПОПОВ-ОҔУРУОТТААХ