Алтынньы 25 күнүттэн Саха сирин үрдүнэн спорт тэрилтэлэригэр QR-куодунан эрэ киириллэр буолар. Ол туһунан физкультура, спорт миниистирин солбуйааччы Александр Бугаев социальнай ситимнэргэ быһа эпиирин кэмигэр иһитиннэрдэ.
Ол курдук, тренажернай, спортивнай саалаларга, фитнес-кулууптарга, бассейннарга, манежтарга, хайыһар базаларыгар, катоктарга, “ГТО” кииннэригэр, о.д.а. киирэргэ QR-куод ирдэнэр буолар.
Оттон сэтинньи 1 күнүттэн QR-куод систиэмэтэ эрэстэрээннэргэ, остолобуойдарга, банкетнай саалаларга, кафеларга киирэр.
Манна киирэргэ «Госуслуги.Стопкоронавирус» портал сыһыарыытыттан ылыллыбыт QR-куодтаах вакцинация сэртипикээтин, эбэтэр коронавируһунан ыалдьыы туһунан сэртипикээти уонна тус докумуону көрдөрүллүөхтээх. QR-куоду кумааҕыга бэчээттэтэн, эбэтэр төлөпүөҥҥэ илдьэ сылдьан, көрдөрүөххэ сөп.
Ангелина Васильева, “Саха сирэ” хаһыат, edersaas.ru