«Спорт-норма ТУР/21». «Манчаары оонньууларын» бастакы күнэ сэрээккэттэн саҕаланна

Бүтүн Арассыыйатааҕы «Спорт-норма ТУР/21» тур чэрчитинэн, «Манчаары оонньуулара» бары хамсаныан-имсэниэн баҕалаахтарга, чөл, чэгиэн олоҕу тутуһааччыларга уонна күөн күрэс түһүлгэтин кыттыылаахтарыгар бүгүн сарсыарда сэрээккэттэн саҕаланна. Дьэ, онон түөрт күн устатыгар «Успуорт-олох нуорумата» федеральнай бырайыак бэрэстэбиитэллэрин кытары Бэрдьигэстээххэ Кыайыы болуоссатыгар сэрээккэлээн, спортсменнар күрэхтэһиигэ бэлэмнэниэхтэрэ, күүс-сэниэ эбиниэхтэрэ диэн СИА иһитиннэрэр.

Бүгүн, от ыйын 7 күнүгэр, Бэрдьигэстээххэ «Успуорт-олох нуорумата» федеральнай бырайыак иитинэн, Арассыыйатааҕы «Спорт-норма ТУР/21» саҕаланна. Бу тэрээһин олимпиецтары өйүүр соруктаах, ону сэргэ Арассыыйа бары олохтоохторо доруобуйаларын чэбдигирдэргэ хамсаналларыгар сөптөөх уонна табыгастаах усулуобуйаны тэрийэр сыаллаах ыытыллар. Итинэн сиэттэрэн, Бэрдьигэстээххэ бүгүҥҥү күн сарсыардааҥы хамсаныыттан-имсэнииттэн сэрээккэттэн саҕаламмыта эриэккэс. Ону Баһылай Манчаары аатынан успуорт национальнай көрүҥнэригэр өрөспүүбүлүкэтээҕи киин дириэктэрэ Гаврил Мохначевский иилээн-саҕалаан ыытта.

«Бастатан туран, тэрээһин Бэрдьигэстээх олохтоохторугар туһаайыллар. Тоҕо диэтэххэ, «Манчаары оонньууларын» курдук улахан болҕомтону тардар далааһыннаах тэрээһининэн биһиги элбэх киһини хабыахтаахпыт. Ким баҕалаах кэлэн физкултууранан дьарыктанары көрүөн да сөп, бастыҥ спортсменнар ыытар маастар-кылаастарыгар кыттыан да сөп«, — диэтэ кини.

«Успуорт — олох нуорумата» федеральнай бырайыак бэрэстэбиитэллэрэ  сарсыардааҥҥы үөрүүлээх тэрээһиҥҥэ кытыннылар. Көҕүлээччилэртэн биирдэстэрэ Михаил Пахомчик киэн туттан туран бу тэрээһин Саха сириттэн саҕаланарын бэлиэтээтэ. Мантан салгыы коронавирус дьаҥыттан көрөн, атын дойдулар куораттара кыттыыны ылыахтарын эттэ.

«Өрөспүүбүлүкэ дьаһалтатын, успуорт миниистирин кытта элбэх үлэ ыытылынна. Бырайыагы олоххо киллэрии манна табылынна«, — диэтэ Пахомчик.

Кини кэллиэгэтэ Алена Леонтьева иһитиннэрбитинэн, Бэрдьигэстээххэ бырайыак табылыннаҕына, тур сыл ахсын ыытыллар улахан спортивнай тэрээһиҥҥэ кубулуйуохтаах.

«Ханнык баҕарар тэрээһиҥҥэ эбии киллэрэн биэриэххэ сөп, холобур бу, «Манчаары оонньууларыгар» курдук, эбэтэр бэйэтэ туһунан да ыытыллыан сөп«, — диэтэ.

Бэрдьигэстээххэ бу тур иитинэн успуорт национальнай көрүҥнэригэр маастар-кылаастар, «Манчаары оонньууларын» кыттыылаахтарыгар доруобуйаны чэбдигирдэр сүүрүүлэр ыытыллаллар.

Федеральнай тэрээһини РФ успуорка миниистирэ Олег Матыцин арыйар. Онтон салгыы бырайыак дойду устун айанныа, дойду тоҕус нэһилиэнньэлээх пууна успуордунан дьарыктанарга, чөл, чэгиэн олохтоох буоларга ыҥыран чаҕылхай от күөҕэ өҥүнэн кырааскаланыа.

Мария Васильева (СИА) хаартыскаҕа түһэриитэ.