Спорт миниистирэ Георгий Балакшин сарсыардааҥҥы сэрээккэ сезонун арыйда

Саха сирин үрдүнэн үгэс буолбут сарсыардааҥҥы сэрээккэ сезона саҕаланна. Бүгүн «Туймаада» стадиоҥҥа Дьокуускай олохтоохторугар уонна ыалдьыттарыгар сэрээккэни спорт миниистирэ, Арассыыйа алта төгүллээх чөмпүйүөнэ, Европа чөмпүйэнээтин үс төгүллээх кыайыылааҕа,  Олимпийскай оонньуулар боруонса призердара, спорт үтүөлээх маастара Георгий Балакшин ыытта.

Кэлэр бэнидиэнньиктэн уопсастыбаннай инструктордар салалталарынан киин куорат Ленин, Орджоникидзе болуоссаттарыгар, «Чолбон» бассейҥҥа, «Триумф» Спорт киинин былаһааккатыгар, Роман Дмитриев аатынан олимпийскай солбук училищетын былаһааккатыгар, Николай Тарскай аатынан «Туймаада» стадиоҥҥа, Циркэ болуоссатыгар, Норуоттар доҕордоһууларын болуоссатыгар, о.д.а. сарсырдааҥҥы сэрээккэлэр ыытыллар буолуохтара.

Сылтан сыл сарсыардааҥҥы сэрээккэни ыытар улуустар ахсааннара эбиллэр. Ол курдук, биэс сыллааҕыта уон биэс улуус сэрээккэлиир эбит буоллаҕына, быйыл сүүрбэ муниципальнай тэриллиигэ — Алдаҥҥа, Аммаҕа, Кэбээйигэ, Мэҥэ Хаҥаласка, Дьааҥыга, Ленскэйгэ, Миирнэйгэ, Өлөөҥҥө, Ньурбаҕа, Томпоҕо, Үөһээ Бүлүүгэ, Үөһээ Халымаҕа, Бүлүүгэ, Өлүөхүмэҕэ, Тааттаа, Нерюнгрига, Уус Маайаҕа, Чурапчыга, Усуйаанаҕа уонна Жатай бөһүөлэгэр — нэһилиэнньэ доруобуйатын бөҕөргөтүнүүтүгэр туһуланар тэрээһиннэр тиһиктээхтик ыытыллыахтара.
Роман Попов

Ааптар хаартыскаҕа түһэриитэ.