Сүрүн

Спорт эбийиэктэрэ дьиэлэри кытары тэҥҥэ былааннаныахтара

Дьон-сэргэ дьиэтин таһыгар спордунан туох да хааччаҕа суох дьарыктанарыгар анал былаһааккалар, тренажердар баар буолуохтаахтар. Спорт эбийиэктэрэ элбэх кыбартыыралаах дьиэлэри былаанныырга хайаатар да киириэхтээхтэр. Бу туһунан Ил Дархан Айсен Николаев спорт, физкультура сэбиэтин мунньаҕар иһитиннэрдэ.

Дьиэлэри былаанныырга спортивнай былаһааккалар, таһырдьа турар тренажердар эмиэ бырайыакка киириэхтээхтэр. Саха сирин усулуобуйатын учуоттаан туран, элбэх кыбартыыралаах дьиэлэргэ спортивнай саала сирин эмиэ көрүөххэ. Туһааннаах инвентарынан хааччыллыыга тутааччылар, атын тэрилтэлэр, о.д.а. сирдэртэн үбүлээһини көрдөтүөххэ. Манна, мин санаабар, чааһынай бизнеһы кытары үлэлиир ордук, – диэн Айсен Сергеевич спортивнай былаһааккалары, саалалары тутуу туһунан бэлиэтээн эттэ.

Итини таһынан мунньахха өрөспүүбүлүкэҕэ спорт сайдыытын былаанын көрдүлэр. Манна сыһыаран Ил Дархан нэһилиэнньэлээх пууннарга баар спортивнай саала дьон-сэргэ киирэн дьарыктанарыгар куруутун аһаҕас уонна хааччаҕа суох буолуохтааҕын ыйда. Түмүккэ Ил Дархан 2030 сылга диэри оҕо спордун сайдыытын бырагырааматын оҥорон олоххо киллэрэ охсорго эттэ. Бырагыраамаҕа оскуолаларга физкультура уруоктарын чааһын элбэтии эмиэ учуоттаныллыаҕа.

Аграфена КУЗЬМИНА

0
0
Telegram @edersaas20