Кэбээйи улууһун Куокуй нэһилиэгэр Саргылаана уонна Семен Спиридоновтары билбэт, ытыктаабат киhи суох.
edersaas.ru
Кинилэр ыал буолан олорбуттара номнуо 34 сыл буолла. Иллээх дьиэ кэргэн икки кэрэ кыыстаах, икки ньургун уоллаах итиэннэ тоҕус минньигэсчэй сиэннэрдээх. Хас биирдии дьиэ кэргэн оҕону иитиигэ араас ньыманы туһанар. Ол курдук, Спиридоновтар бэйэлэрэ бэрт үлэһит дьон буоланнар, оҕолорун үлэнэн иитэллэр. Ол түмүгэр, уолаттара булка-алка сыhыаннаахтар, оттон кыргыттара оҕуруотчуттар, иистэнньэҥнэр. Кыргыттар иккиэн учуутал идэтин талбыттара, уолаттар дьиэ кэргэн тэринэн, бур-буруо таhааран, туспа олороллор. Аҕаларын батан, үчүгэй мас уустара, байанайдаах булчуттар.
Дьиэ кэргэн үтүө үгэстэрин үйэтитэн, Семен Никифорович сүөһү-сылгы уонна сибиинньэ иитиитинэн дьарыгырар. Бэйэтэ уран ойууһут, бэрт уус итиэннэ чөл олоҕу тутуhар. Оҕолорун кыра эрдэхтэриттэн муус ылыытыгар, сүөhү көрүүтүгэр, окко-маска, сир аhыгар, булка илдьэ сылдьара. Ол түмүгэр, оҕолор бары үлэҕэ-хамнаска олус сыстаҕастар, туохтан да иҥнэн турбаттар. Хас сайын ахсын дьиэ кэргэттэринээн кэлэннэр, аҕаларын кытары оттоhоллор.
Спиридоновтар сайын аайы үүт туттараллар, сир астыыллар, оҕуруот араас аhын олордоллор. Саас аайы Александр Соловьев биирдэм хаһаайыстыбатыттан сибиинньэ оҕотун атыылаhан ылан, сайын устатыгар иитэн, күhүн идэhэлэнэллэр. Ол курдук, быйыл эмиэ икки сибиинньэ оҕотун атыыластылар, онтуктара кыhын идэhэҕэ эбии бэртээхэй аhынан буолуо турдаҕа.
Дьиэ кэргэн күнүнэн биир дойдулаахтарбын, Куокуй ытык-мааны ыалларын, Саргылаана, Семен Спиридоновтары итиитик-истиҥник эҕэрдэлиибин! Эһиги иллээх-эйэлэх дьиэ кэргэҥҥитигэр өйдөһүүнү-өйөһүүнү баҕарабын, олоххутугар өрүү үөрүү үксээтин, кэрэ кэккэлэстин, доруобуйа арыалластын, таптал таластын, ситиһии сиэттистин, дьол толордун, баай эрэ батыстын! Хаһан даҕаны хомолто, хоргутуу диэни билимэҥ!
Варвара Спиридонова, Куокуйдааҕы модельнай библиотека сэбиэдиссэйэ, «Саха сирэ» хаһыакка, edersaas.ru саайтка анаан.