Дойду бэрэсидьиэнэ Төрүт Сокуоҥҥа көннөрүүлэри киллэрэргэ Бүтүн Арассыыйатааҕы куоластааһыны от ыйын 1 күнүгэр ыытыы туһунан эттэ. Үөһээ Бүлүү улууһунааҕы үөрэх управлениетын салайааччыта Спиридон Борбуев манна санаатын билиһиннэрэбит.
— Дойду бэрэсидьиэнэ Владимир Путин от ыйын 1 күнүгэр Конституцияҕа куоластааһын барыаҕа диэн эттэ. Ыйы кыайбат кэм хаалла. Онон тус санаабын эттэххэ, Конституция 90-с сыллар саҕаланыыларыгар уонна Сэбиэскэй кэм суох буолуутун уустук кэмигэр ылыныллыбыта. Оччотооҕу кэм олоҕор сөп түбэһэр Конституция ылыныллыбыта диэххэ наада. Ханнык баҕарар сокуону, Конституция да буоллун, дойду кэлэр кэм ирдэбиллэригэр сөп түбэһиннэрэн уларытан иһиэхтээх. Сүүрбэлии-отуттуу сыл буола-буола, сүрүн докумуоннары олоххо сөп түбэһиннэрэн тупсарыахтаах, уларытыахтаах диэн сыаналыыбын. Холобура, бу киириэхтээх уларытыыларга тохтоотоххо, социальнай мэктиэлэр туһунан эттэххэ, биэнсийэ индексацияланыахтаах.
Маны таһынан, бэйэни салайыныыны күүһүрдэн биэрии туһунан 131 №-дээх сокуоҥҥа сөп түбэһиннэрэн эттэххэ, бу сокуоҥҥа олоҕуран улуустар, нэһилиэктэр бэйэлэрэ сөпкө дьаһанан үгүс тутуулары, дьон-сэргэ олоҕо тупсарыгар хамсааһыннары ыытар буолбуттарын бэлиэтиэм этэ. Судаарыстыбаннай тыл туһунан этэр буоллахха, Арассыыйа Федерациятыгар элбэх араас тыллаах норуот олорор. «Государствообразующий язык» – бу мөккүөрдээх соҕус этии. Аҥаардас биир эрэ омугу чорботор сыыһа дии саныыбын.
Ульяна Захарова