Спиридон Борбуев: «Айсен Николаев цифровой технология сайдыытыгар улахан болҕомтотун уурда»
Спиридон Борбуев, Үөһээ Бүлүүтээҕи үөрэх управлениетын начаалынньыга:
— Айсен Сергеевич Николаев өрөспүүбүлүкэни салайбыта оруобуна биир сылын туолла. Айсен Николаевы саҥа үйэ салайааччытын быһыытынан сыаналыыбын. Өрөспүүбүлүкэ урукку бэрэсидьиэннэриттэн сааһынан лаппа эдэр, саҥалыы, аныгылыы көрүүлээх, толкуйдаах салайааччы. Цифровой технология сайдыытыгар улахан болҕомтотун уурда. Маны таһынан, саха норуотун, дьонун-сэргэтин киэҥ эйгэҕэ таһаарыыга үлэлэһэн эрэр. Бырабыыталыстыба «аһаҕас» буолла. Салайааччылар араас тэрээһиннэргэ олохтоохтору кытары тэҥҥэ сылдьан кыттар буоллулар. Быһата, дьоҥҥо-сэргэҕэ чугас буоллулар диэн сыаналыыбын.
Өрөспүүбүлүкэ бастакы бэрэсидьиэнэ Михаил Николаев Саха сирин норуотун култууратын, тылын-өһүн сайыннарыыга болҕомтотун уурбута. Сахалыы үөрэтии концепциятын саҕалаабыта. Оттон Вячеслав Штыров өрөспүүбүлүкэҕэ бырамыысыланнас сайдыытыгар үлэлэспитэ. «Бүлүү» суола тутуллубута, Бүлүү эҥэр гаастааһын саҕаламмыта. Егор Борисов тыа хаһаайыстыбатыгар уонна тыа дьонун олоҕун сайдарыгар үлэлээбитэ. Социальнай эбийиэктэри тутуу күүскэ ыытыллыбыта. Холобур, Үөһээ Бүлүүгэ Хоро, Кэнтик, Нам оскуолалара тутуллубуттара.
Биһиги корр., edersaas.ru