«Спецназ добра» ыарыыны утары үлэҕэ кыттыста

Бөлөххө киир:

Саха сирин эмчиттэригэр «Спецназ добра» хамсааһын автоволонтердара көмөҕө кэллилэр. Кинилэр икки өрөбүл күн иһигэр куорат поликлиникаларын быраастарын ыарыһахтарга илдьэн, 260-тан тахса ыҥырыыны толордулар.

edersaas.ru

«Спецназ добра» диэн Дьокуускайга тэриллибит хамсааһын актыбыыстара ханна туох ыарахан баарыгар көхтөөхтүк кыттыһа охсоллор. Кинилэр бырайыактара баар балаһыанньаттан көрөн, эмискэччи да үөскүөн сөп.


Хамсааһыны тэрийбит, «Биир ньыгыл Арассыыйа» Саха сиринээҕи отделениетын РИК салайааччыта Руслан Платонов куорат балыыһаларыгар бэйэ тиэхиньикэтинэн көмөлөһөргө этии киллэрбитин биир санаалаахтара үөрэ-көтө ылыммыттара.


— Тохсунньу 29 күнүгэр 6 автоволонтер-«спецназовец» бэйэбит массыынабытынан кэлэммит куорат 1 №-дээх поликлиникатын, Дьокуускай куораттааҕы Мэдиссиинэ киинин, 3 №-дээх килиниичэскэй балыыһа киинин быраастарын кытары көрсүбүппүт. Харыстанар сириэстибэлэри ылан баран, эмтиир тэрилтэлэринэн арахсыбыппыт», -– диэн Руслан Платонов кэпсиир.
Бу өрөбүллэргэ эмчиттэргэ көмөлөспүт уонна ыарыыны бохсорго бэйэлэрин кылааттарын киллэрсибит дьон ортотугар араас идэлээхтэр бааллар. Холобур, ООО «Династия+» ХЭО генеральнай дириэктэрэ Петр Севастьянов, «Арассыыйа – мин устуоруйам» мусуой-комплексын дириэктэрэ Дмитрий Соловьев, М.Аммосов аатынан ХИФУ профессиональнай компетенциялары уонна идэни үрдэтии институтун салайааччы Майя Курнева, урбаанньыт Дархан Макаров.
— Билигин доруобуйа харыстабылын тэрилтэлэригэр ноҕурууска олус улахан: биир эмчиккэ ортотунан 40-50 ыҥырыы сүктэриллэр. Ыҥырыыны барытын ситиһэн толорор туһугар киэһэ хойукка диэри үлэлииллэр. Онон, куорат олохтоохторо өрөбүл күннэргэ көмөлөһөргө этии киллэрбиттэригэр биһиги олус үөрбүппүт. Кинилэр бэйэлэрин массыыналарынан быраастары уонна мэдиссиинискэй сиэстэрэлэри ыарыһахха тириэртилэр, онон мэдиссиинискэй көмөнү оҥорорбутугар улаханнык көмөлөстүлэр, — диэн куорат 1 №-дээх поликлиникатын кылаабынай бырааһа Алевтина Эверстова.

Массыынанан волонтерство өрөспүүбүлэ эмчиттэригэр көмөлөһөр бастакы уопута табылынна. Руслан Платонов доброволецтар инникитин даҕаны бэйэлэрин массыыналарынан эмчиттэргэ көмөлөһөргө бэлэмнэрин туһунан эттэ. Кинилэргэ СӨ Доруобуйа харыстабылын миниистирэ Лена Афанасьева махталын биллэрдэ.

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0